സൂറത്ത് (ഗുജറാത്ത്): പ്രധാനമന്ത്രി നരേന്ദ്ര മോദിയും ആഭ്യന്തര മന്ത്രി അമിത് ഷായും മാനസിക യുദ്ധത്തില്‍ വിദഗ്ധരാണെന്ന് മുതിര്‍ന്ന കോണ്‍ഗ്രസ് നേതാവ് ജയ്‌റാം രമേശ്. ഇരുവരുടെയും പ്രവര്‍ത്തനങ്ങള്‍ ഇതിനു ഉദാഹരണമാണെന്നും അദേഹം പറഞ്ഞു. ബിജെപിയുടെ നേതൃത്വത്തിലുള്ള എന്‍ഡിഎ 400 സീറ്റില്‍ അധികം വിജയിക്കുമെന്ന വാദത്തെ പ്രതിരോധിക്കവെയാണ് അദേഹം ഇക്കാര്യം പറഞ്ഞത്.
വരാനിരിക്കുന്ന ലോക്‌സഭാ തെരഞ്ഞെടുപ്പില്‍ എന്‍ഡിഎയുടെ വമ്പന്‍ വിജയ ലക്ഷ്യം കോണ്‍ഗ്രസ് നേതൃത്വത്തിന് ബുദ്ധിമുട്ടുണ്ടാക്കുന്നു എന്ന ബിജെപി ആക്ഷേപത്തിനു പിന്നാലെയാണ് മുതിര്‍ന്ന കോണ്‍ഗ്രസ് നേതാവിന്റെ പ്രതികരണം. നമ്മുടെ രാജ്യത്ത് തെരഞ്ഞെടുപ്പുകള്‍ സൗന്ദര്യമത്സരങ്ങളല്ല. അവ പാര്‍ട്ടികള്‍ ഉള്‍പ്പെടുന്ന പോരാട്ടങ്ങള്‍ മാത്രമല്ല, പ്രത്യയശാസ്ത്രങ്ങളുടെയും ചിഹ്നങ്ങളുടെയും പതാകകളുടെയും പോരാട്ടത്തെ പ്രതിനിധീകരിക്കുന്നു.
സ്വന്തമായി 370 സീറ്റുകള്‍ നേടാനും എന്‍ഡിഎ സഖ്യത്തില്‍ 400 സീറ്റുകള്‍ നേടുമെന്ന് അവര്‍ക്ക് അത്ര ശുഭാപ്തിവിശ്വാസമുണ്ടെങ്കില്‍, എന്തുകൊണ്ടാണ് അവര്‍ ബിജെഡി, പവന്‍ കല്യാണ്, അല്ലെങ്കില്‍ ടിഡിപി എന്നിവയ്‌ക്ക് പിന്നാലെ ഓടുന്നതെന്നും അദേഹം ചോദിച്ചു. അതേസമയം മറ്റു പ്രദേശിക പാര്‍ട്ടികള്‍ മോദി പ്രഭാവത്തില്‍ വന്നു ചേരുന്നതാണെന്നും സദ്ഭരണം കാഴ്ചവച്ചാല്‍ ജനങ്ങള്‍ ഒപ്പം നില്‍ക്കുമെന്നും ഉള്ളതിനുള്ള പ്രതിഫലനമാണ് ഇന്ന് കാണുന്നതെന്ന് ബിജെപി വ്യക്തമാക്കി.
