ന്യൂദല്‍ഹി: ലോക്സഭാ തെരഞ്ഞെടുപ്പിന് മുന്നോടിയായി ബിജെപിക്ക് സംഭാവന നല്‍കി പ്രധാനമന്ത്രി നരേന്ദ്രമോദി. സംഭാവന നല്‍കിയതിന് ലഭിച്ച രണ്ടായിരം രൂപയുടെ രസീതും പ്രധാനമന്ത്രി എക്സില്‍ പങ്കുവെച്ചിട്ടുണ്ട്. മറ്റുള്ളവര്‍ പാര്‍ട്ടിക്ക് സംഭാവന നല്‍കണമെന്നും മോദി അഭ്യര്‍ത്ഥിച്ചിട്ടുണ്ട്.
ബിജെപിക്ക് സംഭാവന നല്‍കുന്നതില്‍ സന്തോഷമുണ്ട്. വികസിത ഭാരതം കെട്ടിപ്പടുക്കാനുള്ള ശ്രമങ്ങള്‍ക്ക് കരുത്തുപകരുന്നതാണിത്. രാജ്യത്തെ ശക്തിപ്പെടുത്താനുള്ള ശ്രമങ്ങള്‍ക്ക് കരുത്തുപകരാന്‍ നമോആപ്പ് വഴി സംഭാവന നല്‍കാന്‍ എല്ലാവരോടും അഭ്യര്‍ത്ഥിക്കുന്നതായും മോദി കുറിച്ചു.
കഴിഞ്ഞ ദിവസം ബിജെപി അധ്യക്ഷന്‍ ജെ.പി. നദ്ദയും പാര്‍ട്ടിക്ക് ആയിരം രൂപ സംഭാവന നല്‍കിയിരുന്നു. മറ്റുള്ളവരും സ്വയം മുന്നോട്ടുവന്ന് പാര്‍ട്ടിക്ക് സംഭാവനകള്‍ നല്‍കണമെന്ന് അദ്ദേഹവും ആവശ്യപ്പെട്ടിരുന്നു.
