കല്പറ്റ: പൂക്കോട് വെറ്ററിനറി കോളജ് രണ്ടാംവര്ഷ ബിരുദ വിദ്യാര്ത്ഥി സിദ്ധാര്ത്ഥന്റെ മരണക്കേസിന്റെ പോലീസ് റിമാന്ഡ് റിപ്പോര്ട്ടില് എസ്എഫ്ഐ എന്ന പരാമര്ശമേ ഇല്ല. കടുത്ത രാഷ്ട്രീയ സമ്മര്ദ്ദവും സര്ക്കാര് ഇടപെടലും മൂലമാണിത്. എന്നാല്, മരണമല്ല കൊലപാതകമാകയിരിക്കാമെന്നും അതിന്റെ സാധ്യത പരിശോധിക്കണമെന്നും റിമാന്ഡ് റിപ്പോര്ട്ടില് പറയുന്നു. മരണത്തിനുമുമ്പ് സിദ്ധാര്ത്ഥന് നേരിടേണ്ടിവന്നത് അതിക്രൂര മര്ദനമാണെന്ന വാര്ത്തകള് ശരിവയ്ക്കുന്നതാണ് റിമാന്ഡ് റിപ്പോര്ട്ട്.
കൊലപാതകമായിരിക്കാനുള്ള സാധ്യത പരിശോധിക്കണം, അതിനാല് ജാമ്യം അനുവദിക്കരുത്. കേസില് ഉള്പ്പെട്ട 18 പ്രതികളില് ഒരാള് ഒഴികെയുള്ളവര് ബെല്റ്റുകൊണ്ടും കേബിള് വയര് കൊണ്ടും സിദ്ധാര്ത്ഥനെ മര്ദ്ദിച്ചു. അടിക്കുകയും തൊഴിക്കുകയും ചെയ്തു. പ്രതികളുടെ പ്രവൃത്തി മരണമല്ലാതെ മറ്റൊരു മാര്വുമില്ലാത്ത സാഹചര്യത്തിലേക്ക് സിദ്ധാര്ത്ഥനെ നയിച്ചു, റിപ്പോര്ട്ട് വിശദീകരിക്കുന്നു.
സഹപാഠിയോട് സിദ്ധാര്ത്ഥന് അടുത്ത് പെരുമാറിയെന്ന് കോളജില് ആരോപണം ഉയര്ന്നിരുന്നു. ഇതേത്തുടര്ന്ന് സഹപാഠികളും സീനിയര് വിദ്യാര്ത്ഥികളും ഉള്പ്പെടെ പ്രതികള് സിദ്ധാര്ത്ഥനെ പൊതുവിചാരണ നടത്തി അപമാനിക്കാന് പദ്ധതിയിട്ടു. ഫെബ്രുവരി 15 ന് തിരുവനന്തപുരം നെടുമങ്ങാടിലെ വീട്ടിലേക്ക് പുറപ്പെട്ട സിദ്ധാര്ത്ഥനെ, വിദ്യാര്ത്ഥിനി നിയമ നടപടിയുമായി മുന്നോട്ടുപോയാല് പോലീസ് കേസാകുമെന്നും മെന്സ് ഹോസ്റ്റലിലെ അലിഖിത നിയമം അനുസരിച്ച് പ്രശ്നം ഒത്തുതീര്ക്കാമെന്നും അറിയിച്ച് കാമ്പസില് തിരികെ എത്തിച്ചു. ട്രെയിനില് യാത്ര ചെയ്യുകയായിരുന്ന സിദ്ധാര്ത്ഥന് എറണാകുളത്ത് എത്തിയപ്പോഴാണ് രഹാന് എന്ന വിദ്യാര്ത്ഥിയുടെ ഫോണില് നിന്ന് പ്രതികളിലൊരാളായ ഡാനിഷ് വിളിച്ച് വരുത്തിയത്.
16ന് രാവിലെ കാമ്പസില് എത്തിയ സിദ്ധാര്ത്ഥനെ പ്രതികള് ഹോസ്റ്റല് മുറിയില് തടങ്കലിലാക്കി. അന്നു രാത്രി ഒമ്പത് മുതല് കാമ്പസില് വിവിധ സ്ഥലങ്ങളില് കൊണ്ടുപോയി മര്ദ്ദിച്ചു. പിന്നീട് ഹോസ്റ്റലിലെ 21-ാം നമ്പര് മുറിയിലെത്തിച്ചും ഹോസ്റ്റലിന്റെ നടുമുറ്റത്ത് അടിവസ്ത്രം ഒഴികെ മറ്റെല്ലാം അഴിപ്പിച്ചും മര്ദ്ദനം തുടര്ന്നു. 17ന് പുലര്ച്ചെ രണ്ടു വരെ പരസ്യവിചാരണ ചെയ്ത് അപമാനിച്ചു.
സിദ്ധാര്ത്ഥന്റേത് ആത്മഹത്യയല്ല, കൊലപാതകമാണെന്നും ദേഹത്തെ പരിക്കുകള് ഇക്കാര്യം സാധൂകരിക്കുന്നതാണെന്നും മാതാപിതാക്കളും ബന്ധുക്കളും അധികാരികള്ക്കു നല്കിയ പരാതികളില് ആരോപിക്കുന്നുണ്ട്. ദൃശ്യമാധ്യമങ്ങള് മുഖേനയും ഈ ആരോപണം ഉന്നയിച്ചിട്ടുണ്ട്. ഇക്കാര്യം ആഴത്തില് അന്വേഷിച്ച് കൊലപാതക സാധ്യത സംബന്ധിച്ച് വ്യക്തമായ നിഗമനത്തില് എത്തിച്ചേരേണ്ടതുണ്ട്. ജാമ്യം അനുവദിച്ചാല് പ്രതികള് സാക്ഷികളെ സ്വാധീനിക്കാനും ഭീഷണിപ്പെടുത്താനും അതുവഴി കേസന്വേഷണം തടസപ്പെടുത്താനും സാധ്യതയുണ്ടെന്നും റിമാന്ഡ് റിപ്പോര്ട്ടില് പറയുന്നു.
