സാമ്പത്തിക വർഷം അവസാനിക്കാൻ ഇനി ദിവസങ്ങൾ മാത്രമാണ് ബാക്കിയുള്ളത്. നിരവധി സാമ്പത്തിക കാര്യങ്ങൾ ചെയ്യേണ്ട ഒരു മാസം കൂടിയാണ് മാർച്ച്. മാർച്ച് മാസത്തിൽ ചെയ്ത് തീർക്കേണ്ടതും കാലാവധി അവസാനിക്കുന്നതുമായ ചില സുപ്രധാന കാര്യങ്ങൾ നോക്കാം…
2023-2024 സാമ്പത്തിക വർഷത്തേയ്ക്ക് ആദായനികുതി ഇളവ് ക്ലെയിം ചെയ്യുന്നതിനായി മാർച്ച് 31-ന് മുമ്പ് ആവശ്യമായ നിക്ഷേപം നടത്തണം. ഇതിന് ശേഷം നടത്തുന്ന നിക്ഷേപങ്ങൾക്ക് അടുത്ത വർഷം മാത്രമേ നികുതി ആനുകൂല്യങ്ങൾ ലഭ്യമാകുകയുള്ളൂ.
.
എസ്ബിഐ പ്രത്യേക സ്ഥിര നിക്ഷേപ പദ്ധതി:
7.10 ശതമാനം പലിശ നിരക്കിൽ 400 ദിവസത്തെ (അമൃത് കലാഷ്) നിക്ഷേപ പദ്ധതി എസ്ബിഐ അവതരിപ്പിച്ചിരുന്നു. 2023 ഏപ്രിൽ 12 മുതലാണ് പദ്ധതി പ്രാബല്യത്തിൽ വന്നത്. മുതിർന്ന പൗരന്മാർക്ക് 7.60 ശതമാനം പലിശ ലഭിക്കും. 2024 മാർച്ച് 31 വരെ ഈ പദ്ധതിക്ക് സാധുതയുണ്ടാകും.
എസ്ബിഐ ഭവന വായ്പ :
സ്റ്റേറ്റ് ബാങ്ക് ഓഫ് ഇന്ത്യ താരതമ്യേന കുറഞ്ഞ പലിശ നിരക്കുകളുള്ള ഭവന വായ്പകൾ ഉപയോക്താക്കൾക്ക് വാഗ്ദാനം ചെയ്യുന്നുണ്ട്. ഇത് 2024 മാർച്ച് 31 വരെ തുടരും.
ഐഡിബിഐ ബാങ്കിന്റെ പ്രത്യേക എഫ്ഡി:
സാധാരണ നിക്ഷേപകർക്ക് 7.05 മുതൽ 7.25 ശതമാനം വരെയും മുതിർന്ന പൗരന്മാർക്ക് 7.55 മുതൽ 7.75 ശതമാനം വരെയും പലിശ നിരക്ക് വാഗ്ദാനം ചെയ്യുന്ന ഐഡിബിഐ ബാങ്കിന്റെ എഫ്ഡികൾ 2024 മാർച്ച് 31 വരെ മാത്രമേ ലഭിക്കുകയുള്ളൂ.
ആധാറിന്റെ സൗജന്യ അപ്ഡേറ്റ്:
ആധാർ കാർഡ് വിശദാംശങ്ങൾ അപ്ഡേറ്റ് ചെയ്യുന്നതിനുള്ള അവസാന തീയതി മാർച്ച് 14-ആണ്. ഫീസ് നൽകാതെ തന്നെ നിങ്ങളുടെ പേരോ വിലാസമോ മൊബൈൽ നമ്പറോ മാറ്റാം. ഈ സമയപരിധിക്ക് ശേഷം മാറ്റങ്ങൾ വരുത്തുന്നതിന് ഫീസ് ഈടാക്കും.
