കൊല്ലം : പ്രധാനമന്ത്രി നരേന്ദ്ര മോദിയെ പ്രശംസിച്ച് എന്‍.കെ പ്രേമചന്ദ്രന്‍ എംപി. നരേന്ദ്രമോദി ഉദ്ഘാടനം ചെയ്യുന്ന പദ്ധതികള്‍ ഉറപ്പായും നടക്കുമെന്ന് ഉറപ്പാണെന്ന് അദ്ദേഹം പറഞ്ഞു. പദ്ധതികള്‍ കൃത്യമായി പ്രധാനമന്ത്രി അവലോകനം ചെയ്യും. കുണ്ടറ പള്ളിമുക്ക് റെയില്‍വേ മേല്‍പ്പാലത്തിന്റെ നിര്‍മ്മാണ ഉദ്ഘാടനം പ്രധാനമന്ത്രി നിര്‍വഹിക്കുന്നത് അനുഗ്രഹമാണെന്നും എന്‍.കെ പ്രേമചന്ദ്രന്‍ പറഞ്ഞു.
എല്ലാ മാസവും പ്രധാനമന്ത്രിയുടെ ഓഫീസ് പദ്ധതികള്‍ കൃത്യമായി വിലയിരുത്തും. സ്വാഭാവികമായും കുണ്ടറ പള്ളിമുക്ക് റെയില്‍വേ മേല്‍പ്പാല പദ്ധതി നടക്കുമെന്ന കാര്യത്തില്‍ സംശയമില്ലെന്നും എന്‍.കെ പ്രേമചന്ദ്രന്‍ പറഞ്ഞു.
ഉദ്യോഗസ്ഥരുമായി താന്‍ സംസാരിച്ചിരുന്നു. ആദ്യ ഘട്ടത്തില്‍ തന്നെ പദ്ധതി ഉദ്ഘാടനം ചെയ്യണമോ എന്ന് അവരോട് ചോദിച്ചു. പ്രധാനമന്ത്രി ഉദ്ഘാടനം ചെയ്യുന്ന പദ്ധതികളുടെ മോണിറ്ററിംഗ് എല്ലാ മാസവും നടക്കുമെന്നും സാങ്കേതിക പ്രശ്‌നങ്ങളുണ്ടെങ്കില്‍ കേന്ദ്രം തന്നെ സംസ്ഥാന സര്‍ക്കാരുകളുമായി ബന്ധപ്പെട്ട് പരിഹരിക്കുമെന്നും അവര്‍ മറുപടി നല്‍കി.
