ലഖ്നൗ: റായ്ബറേലി ഉപേക്ഷിച്ച് രാജ്യസഭ വഴി എംപിയാകാനുള്ള നീക്കം ലോക്സഭാ മത്സരങ്ങളില് നിന്നുള്ള ഒളിച്ചോട്ടമാണെന്ന വിലയിരുത്തല് ശക്തമായതോടെ വികാരഭരിതമായ കത്തുമായി സോണിയയുടെ നാടകം. റായ്ബറേലിയിലെ ജനങ്ങളെ അഭിസംബോധന ചെയ്താണ് കോണ്ഗ്രസ് നേതാവിന്റെ പുതിയ കത്ത്.
ആരോഗ്യപ്രശ്നങ്ങളും പ്രായാധിക്യവും കാരണമാണ് വരുന്ന ലോക്സഭാ തെരഞ്ഞെടുപ്പില് മത്സരിക്കാത്തതെന്നാണ് മുന് കോണ്ഗ്രസ് അധ്യക്ഷ റായ്ബറേലി മണ്ഡലത്തിലെ വോട്ടര്മാരെ അറിയിച്ചത്. ‘ഇന്ന് ഞാന് എന്തെങ്കിലുമാണെങ്കില് അതിന് കാരണം നിങ്ങളാണ്. നിങ്ങളുടെ വിശ്വാസത്തെ മാനിക്കാന് ഞാന് എല്ലായ്പ്പോഴും പരമാവധി ശ്രമിച്ചിട്ടുണ്ട് എന്ന് പറയുന്നതില് അഭിമാനമുണ്ട്. ഇപ്പോള് ആരോഗ്യപ്രശ്നങ്ങളും പ്രായവും കാരണം അടുത്ത ലോക്സഭാ തിരഞ്ഞെടുപ്പില് മത്സരിക്കാനാകില്ല.
എനിക്ക് നിങ്ങളെ നേരിട്ട് സേവിക്കാന് അവസരം ലഭിക്കില്ല, പക്ഷേ എന്റെ ഹൃദയവും ആത്മാവും എപ്പോഴും നിങ്ങളോടൊപ്പമുണ്ടാകും. പണ്ടത്തെപ്പോലെ ഭാവിയിലും നിങ്ങള് എനിക്കും എന്റെ കുടുംബത്തിനും ഒപ്പം നില്ക്കുമെന്ന് എനിക്കറിയാം, ഹിന്ദിയില് എഴുതിയ കത്തില് പറയുന്നു. രാജസ്ഥാനില് നിന്നുള്ള രാജ്യസഭാ സീറ്റിലേക്ക് നാമനിര്ദേശ പത്രിക സമര്പ്പിച്ചതിന് തൊട്ടുപിന്നാലെയാണ് വോട്ടര്മാര്ക്കുള്ള സന്ദേശം.
