ന്യൂദല്ഹി: ദല്ഹിയില് മത്സരിക്കാന് വേണമെങ്കില് ഒരു സീറ്റു നല്കാമെന്ന ആപ്പ് വാഗ്ദാനത്തില് മനംനൊന്ത് കോണ്ഗ്രസ്. ആപ്പിന്റെ വാഗ്ദാനം സ്വീകരിക്കാന് സാധ്യമല്ലെന്നും മൂന്നു സീറ്റെങ്കിലും നല്കണമെന്നുമാണ് കോണ്ഗ്രസിന്റെ പ്രതികരണം. മൂന്നു സീറ്റ് ലഭിച്ചാല് സഖ്യമാകാം, ദല്ഹി പ്രദേശ് കോണ്ഗ്രസ് അദ്ധ്യക്ഷന് അരവിന്ദര് സിങ് ലവ്ലി പറഞ്ഞു.
തെരഞ്ഞെടുപ്പില് സഖ്യമുണ്ടാക്കി മത്സരിക്കാനും സീറ്റ് വിഭജന ചര്ച്ച നടത്തി തീരുമാനം എടുക്കാനും കോണ്ഗ്രസ് തയാറാണ്. എന്നാല് തീരുമാനങ്ങള് ആപ്പ് ഏകപക്ഷീയമായിപ്രഖ്യാപിക്കേണ്ട ഒന്നല്ല, ലവ്ലി പറയുന്നു.
2019ലെ ലോക്സഭാ തെരഞ്ഞെടുപ്പില് കോണ്ഗ്രസ് അഞ്ച് സീറ്റുകളില് രണ്ടാം സ്ഥാനത്ത് എത്തിയിരുന്നു. ഇന്ഡി സഖ്യത്തിലെ ഏറ്റവും വലിയ കക്ഷിയാണ് ഞങ്ങള്. മറ്റ് കക്ഷികളുമായി ചേര്ന്ന് പ്രവര്ത്തിക്കാനാണ് പരമാവധി ശ്രമിക്കുന്നത്. ജനാധിപത്യത്തെ സംരക്ഷിക്കാനാണ് കോണ്ഗ്രസ് ശ്രമിക്കുന്നത്. ലവ്ലി പറഞ്ഞു.
