നാദാപുരം: വളയത്ത് നിര്‍മാണത്തിലിരിക്കുന്ന വീടിന്റെ സ്ലാബ് തകര്‍ന്ന് തൊഴിലാളികളായ രണ്ട് യുവാക്കള്‍ മരിച്ചു. രണ്ട് പേര്‍ക്ക് പരിക്ക്. വളയം മാരാംകണ്ടിയിലെ കൊമ്മോട്ടുപൊയില്‍ നവജിത്ത് (30), ആലിശേരിക്കണ്ടി വിഷ്ണു (29) എന്നിവരാണ് മരിച്ചത്. വളയം മാരാംകണ്ടിയില്‍ രാവിലെ ഒമ്പത് മണിയോടെയാണ് സംഭവം. ഇരുനില വീടിന്റെ ഒന്നാം നിലയുടെ സണ്‍ഷേഡ് സ്ലാബ് തകര്‍ന്നാണ് അപകടം.
കൊമ്മോട്ടുപൊയില്‍ ശ്രീബേഷിന്റെ വീടിന്റെ മുകള്‍നിലയുടെ സ്ലാബ് തകര്‍ന്ന് താഴത്തെ നിലയുടെ ചുമരിന്റെ പ്ലാസ്റ്ററിങ് ജോലി ചെയ്യുകയായിരുന്ന തൊഴിലാളികളുടെ തലയിലേക്ക് പതിക്കുകയായിരുന്നു. ഗുരുതരമായി പരിക്കേറ്റവരെ വടകര ഗവ. ജില്ലാ ആശുപത്രിയില്‍ പ്രവേശിപ്പിച്ചു.
