കോര്‍ബ(ഛത്തിസ്ഗഡ്): ഇന്‍ഡി മുന്നണി ഇപ്പോഴും ശക്തമെന്ന അവകാശവാദവുമായി കോണ്‍ഗ്രസ് ജനറല്‍ സെക്രട്ടറി ജയറാം രമേശ്. ജെഡിയുവും ആര്‍എല്‍ഡിയും വിട്ടുപോയത് മുന്നണിയെ ബാധിക്കില്ല. ഇപ്പോഴും 28 പാര്‍ട്ടികള്‍ മുന്നണിയിലുണ്ടെന്ന് ജയറാം രമേശ് അവകാശപ്പെട്ടു.
എഎപി, ഡിഎംകെ, എന്‍സിപി, ശിവസേന-ഉദ്ധവ്, തൃണമൂല്‍ കോണ്‍ഗ്രസ് എന്നിവയുമായി സീറ്റ് ചര്‍ച്ചകള്‍ തുടരുകയാണെന്നും അദ്ദേഹം വാര്‍ത്താസമ്മേളനത്തില്‍ പറഞ്ഞു. ദല്‍ഹിയിലെ ഏഴ് ലോക്‌സഭാസീറ്റിലും മത്സരിക്കുമെന്ന ആപ്പ് നേതാവ് അരവിന്ദ് കേജ്‌രിവാളിന്റെ പ്രസ്താവനയ്‌ക്ക് തൊട്ടുപിന്നാലെയാണ് സീറ്റ് ചര്‍ച്ചകള്‍ തുടരുകയാണെന്ന അവകാശവാദവുമായി കോണ്‍ഗ്രസ് നേതാവ് രംഗത്തെത്തിയത്. ശനിയാഴ്ചയാണ് കോണ്‍ഗ്രസുമായി സഖ്യമില്ലെന്നും ദല്‍ഹിയിലെ എല്ലാ സീറ്റിലും മത്സരിക്കുമെന്ന് കേജ്‌രിവാള്‍ പ്രഖ്യാപിച്ചത്. തൃണമൂല്‍ കോണ്‍ഗ്രസും ഒറ്റയ്‌ക്ക് തെരഞ്ഞെടുപ്പിനെ നേരിടുമെന്ന് മമതാ ബാനര്‍ജിയും പ്രഖ്യാപിച്ചിരുന്നു.
