ചണ്ഡീഗഢ് : ജനനായക് ജനതാ പാർട്ടി (ജെജെപി) എൻഡിഎയുടെ ശക്തമായ പങ്കാളിയാണെന്ന് ഹരിയാന ഉപമുഖ്യമന്ത്രി ദുഷ്യന്ത് ചൗട്ടാല. വരാനിരിക്കുന്ന ലോക്‌സഭാ, നിയമസഭാ തെരഞ്ഞെടുപ്പുകളിൽ ബിജെപി-ജെജെപി സഖ്യമായി ഒരുമിച്ച് ഒരേ ആഹ്വാനത്തിൽ പ്രവർത്തിക്കുമെന്ന് അദ്ദേഹം പറഞ്ഞു.
“ഞങ്ങൾ എൻഡിഎയുടെ ശക്തമായ പങ്കാളിയാണ്, സംസ്ഥാനത്ത് സ്ഥിരതയുള്ള ഒരു സർക്കാർ നൽകാൻ പ്രതിജ്ഞാബദ്ധരാണ്,”- സഖ്യത്തെക്കുറിച്ച് ചോദിച്ചപ്പോൾ അദ്ദേഹം പറഞ്ഞു. എൻഡിഎയ്‌ക്ക് കീഴിൽ ലോക്‌സഭാ, നിയമസഭാ തെരഞ്ഞെടുപ്പുകൾ സംബന്ധിച്ച് ഇരു പാർട്ടികളുടെയും നേതൃത്വം ഒരുമിച്ച് തീരുമാനമെടുക്കുമെന്നും അദ്ദേഹം മാധ്യമപ്രവർത്തകരോട് പറഞ്ഞു.
അതേ സമയം കോൺഗ്രസിനെതിരെ ചൗട്ടാല ആഞ്ഞടിച്ചു. കോൺഗ്രസ് സംസ്ഥാനത്ത് വിഭജിക്കപ്പെട്ട നിലയിലാണെന്നും ദേശീയ തലത്തിൽ പ്രതിപക്ഷം ഭിന്നിച്ചിരിക്കുന്ന അവസ്ഥയാണെന്നും അദ്ദേഹം വ്യക്തമാക്കി. സംസ്ഥാനത്ത് കോൺഗ്രസ് ഭിന്നിച്ചിരിക്കുന്നതായും ഞാൻ കാണുന്നു. അച്ഛൻ-മകൻ ഗ്രൂപ്പുണ്ട്, മറ്റൊന്ന് എസ്ആർകെ ഗ്രൂപ്പാണ്,” ചൗട്ടാല പറഞ്ഞു. ഭൂപീന്ദർ സിംഗ് ഹൂഡയെയും മകൻ ദീപേന്ദർ ഹൂഡയെയും കുമാരി സെൽജ, രൺദീപ് സിംഗ് സുർജേവാല, കിരൺ ചൗധരി എന്നിവരുടെ എസ്ആർകെ ഗ്രൂപ്പിനെയും ഉദ്ദേശിച്ചുകൊണ്ടായിരുന്നു അദ്ദേഹത്തിന്റെ പരാമർശങ്ങൾ.
കോൺഗ്രസിൽ തനിക്ക് ശ്വാസംമുട്ടൽ അനുഭവപ്പെടുന്നുണ്ടെന്ന മുതിർന്ന കോൺഗ്രസ് നേതാവ് അജയ് യാദവിന്റെ പരാമർശത്തെയും ഉപമുഖ്യമന്ത്രി പരാമർശിച്ചു. അദ്ദേഹത്തിന് വേണ്ടി നമ്മുടെ വാതിലുകൾ തുറന്നിട്ടിരിക്കുന്നുവെന്നും ചൗട്ടാല പറഞ്ഞു. കൂടാതെ പഞ്ചാബിലെ തിരഞ്ഞെടുപ്പിന് ശേഷം മറ്റൊരു സംസ്ഥാനവും പാർട്ടിയെ പിന്തുണച്ചിട്ടില്ലെന്ന് അദ്ദേഹം എഎപിയെയും പരിഹസിച്ചു.
നേരത്തെ 2019 ലെ നിയമസഭാ തെരഞ്ഞെടുപ്പിൽ ബിജെപിക്ക് ഭൂരിപക്ഷം കുറഞ്ഞതിനെ തുടർന്ന് അജയ് സിംഗ് ചൗട്ടാലയുടെ നേതൃത്വത്തിലുള്ള ജനനായക് ജനതാ പാർട്ടി (ജെജെപി) ബിജെപിക്ക് പിന്തുണ നൽകിയിരുന്നു. എന്നിരുന്നാലും, അടുത്ത മാസങ്ങളിൽ, ജെജെപിയും ബിജെപിയും സംസ്ഥാനത്തെ 10 ലോക്‌സഭാ സീറ്റുകളിലും മത്സരിക്കാൻ തയ്യാറെടുക്കുകയാണെന്നും സഖ്യം തുടരുന്നതിനോ ഒരുമിച്ച് തെരഞ്ഞെടുപ്പിൽ മത്സരിക്കുന്നതിനോ പ്രതിജ്ഞാബദ്ധത പുലർത്തുന്നുണ്ടെന്ന് നേരത്തെ വ്യക്തമാക്കിയിരുന്നു.
