അയോധ്യപ്രാണപ്രതിഷ്ഠയ്‌ക്കെതിരെ മൂന്ന് ദിവസം നിരാഹാരമനുഷ്ഠിച്ച കോണ്‍ഗ്രസ് നേതാവ് മണി ശങ്കര്‍ അയ്യരുടെ മകളോട് ഫ്ലാറ്റ് ഒഴിഞ്ഞു പോകാന്‍ റസിഡന്‍റ്സ് അസോസിയേഷന്‍. പ്രാണപ്രതിഷ്ഠ നടന്നതില്‍ അത്രയ്‌ക്ക് വിഷമമുണ്ടെങ്കില്‍ ഫ്ലാറ്റൊഴിഞ്ഞു പോകാനാണ് സുരാന താമസിക്കുന്ന ഫ്ളാറ്റിലെ റസിഡന്‍റ്സ് വെല്‍ഫെയര്‍ അസോസിയേഷന്‍ ഭാരവാഹികള്‍ അഭ്യര്‍ത്ഥിച്ചിരിക്കുന്നത്.
മുസ്ലിം പൗരന്മാരോട് ഐക്യദാര്‍ഡ്യം പ്രഖ്യാപിച്ചാണ് താന്‍ നിരാഹാരം നടത്തുന്നതെന്ന് സുരാന അയ്യര്‍ ഫെയ്സ് ബുക്ക് പോസ്റ്റില്‍ പറഞ്ഞു. മൂന്ന് ദിവസം സുരാന അയ്യര്‍ നിരാഹാരം അനുഷ്ഠിച്ചു. “ഭൗതികമായ ആര്‍ത്തിമൂലം മലിനീകരിക്കപ്പെട്ട ദല്‍ഹിയിലെ മനസ്സ് വിവേകശൂന്യമായ ഹിന്ദു ദേശഭക്തിയാല്‍ ആത്മീയമായി വിഷമയമായിരിക്കുന്നു. “- ഫെയ്സ്ബുക്ക് പോസ്റ്റില്‍ സുരാന അയ്യര്‍ വിമര്‍ശിക്കുന്നു.
അങ്ങിനെ ബുദ്ധിമുട്ടുണ്ടെങ്കില്‍ ഇവിടുത്തെ ഫ്ളാറ്റ് ഒഴിയാനായിരുന്നു റസിഡന്‍റ്സ് അസോസിയേഷന്‍ ഭാരവാഹികളുടെ നിര്‍ദേശം. ഇത്തരത്തിലുള്ള പ്രസ്താവന ഈ കോളനിയിലെ താമസക്കാരുടെ മതവികാരത്തെ വ്രണപ്പെടുത്തുന്ന ഒന്നാണ്. അത് കോളനിയുടെ സമാധാനം തകര്‍ക്കുകയും ചെയ്യുന്നു. അതുകൊണ്ട് നിങ്ങള്‍ മറ്റൊരു റസിഡന്‍റ്സ് കോളിനിലേക്ക് മാറിയാല്‍ ഞങ്ങള്‍ക്ക് നിങ്ങളുടെ പ്രവര്‍ത്തനങ്ങള്‍ക്കും പ്രസ്താവനകള്‍ക്കും നേരെ കണ്ണടയ്‌ക്കാമല്ലോ റെസിഡന്‍റ്സ് വെല്‍ഫെയര്‍ അസോസിയേഷന്‍ പറയുന്നു.
കാരണം ഇന്ത്യയൊട്ടാകെയുള്ള ഹിന്ദുക്കള്‍ അഭിമാനനിമിഷമായി കണക്കാക്കിയ ഒന്നാണ് അയോധ്യയിലെ പ്രാണപ്രതിഷ്ഠ. ആവിഷ്കാരസ്വാതന്ത്ര്യം ഇന്ത്യയില്‍ അനുവദിക്കുന്നുണ്ടെങ്കിലും മറ്റൊരു മതത്തിനെതിരായ വിദ്വേഷകമന്‍റ് അനുവദിക്കുന്നില്ലെന്നും പറയുന്നു. മകളുടെ ഇത്തരം നടപടികളെ അപലപിക്കാനും റെസിഡന്‍റ്സ് വെല്‍ഫെയര്‍ അസോസിയേഷന്‍ മണി ശങ്കര്‍ അയ്യരോട് അഭ്യര്‍ത്ഥിച്ചു.
