ന്യൂദല്‍ഹി: രാജ്യത്ത് ചാവേര്‍ ആക്രമണത്തിന് പദ്ധതിയിട്ട കേസില്‍ എട്ട് പേര്‍ക്കെതിരെ എന്‍ ഐ എ കുറ്റപത്രം. മലയാളി തടിയന്റവിട നസീര്‍ ഉള്‍പ്പെടെയുളളവര്‍ക്കെതിരെയാണ് കുറ്റപത്രം.
2013മുതല്‍ ബെംഗളൂരു സെന്‍ട്രല്‍ ജയിലില്‍ തടവിലാണ് തടിയന്റവിട നസീര്‍.കേസില്‍ ഒളിവിലുള്ള ജുനൈദ് അഹമ്മദ് എന്ന ജെഡി, സല്‍മാന്‍ ഖാന്‍ എന്നിവര്‍ വിദേശത്തേക്ക് കടന്നുവെന്നാണ് കരുതുന്നത്.
സൈദ് സുഹൈല്‍ ഖാന്‍, മുഹമ്മദ് ഉമര്‍, സഹിദ് തബ്രേസ്, സയ്യിദ് മുദസില്‍ പാഷ, മുഹമ്മദ് ഫൈസല്‍ റബ്ബാനി എന്നിവരാണ് മറ്റ് പ്രതികള്‍. ഐപിസി, യുഎപിഎ, ആയുധം കൈവശം വയ്‌ക്കല്‍ നിയമം പ്രകാരമുള്ള കുറ്റങ്ങളാണ് ചുമത്തിയിരിക്കുന്നത്.
പിടിയിലായ ഏഴ് പേരില്‍ നിന്നായി ആയുധങ്ങളും വെടിക്കോപ്പുകളും ഗ്രനേഡുകളും വാക്കി ടോക്കികളും കണ്ടെത്തിയിരുന്നു. 2023 ജൂലായ് 18 നായിരുന്നു ഇത്. പ്രതികളില്‍ ഒരാളുടെ വീട്ടില്‍ വച്ചായിരുന്നു ഏഴ് പേരെയും പിടികൂടിയത്. ഇതേവര്‍ഷം ഒക്ടോബറിലാണ് എന്‍ഐഎ കേസ് ഏറ്റെടുത്തതും അന്വേഷണത്തില്‍ തടിയന്റവിട നസീറിനും പങ്കുള്ളതായും കണ്ടെത്തിയത്. 2017 ല്‍ എല്ലാ പ്രതികളും ബെംഗളൂരു ജയിലില്‍ തടവിലായിരുന്ന വേളയിലാണ് പ്രതികള്‍ ആക്രമണത്തിനുള്ള പദ്ധതികള്‍ തയാറാക്കിയത്.
ലഷ്‌കര്‍-ഇ-തോയ്ബയിലേക്ക് കേസിലെ ഏഴ് പ്രതികളെയും റിക്രൂട്ട് ചെയ്തത് തടിയന്റവിട നസീറാണ്. വിദേശത്തേക്ക് കടന്ന പ്രതികള്‍ അയച്ചുകൊടുത്ത പണം ഉപയോഗിച്ചാണ് മറ്റ് പ്രതികള്‍ ചാവേര്‍ സ്‌ഫോടന പദ്ധതികള്‍ തയാറാക്കിയത്.
