ന്യൂഡൽഹി: 2025 നവംബറിൽ ഡൽഹി ചെങ്കോട്ടയ്ക്ക് സമീപം നടന്ന കാർ ബോംബ് സ്‌ഫോടന കേസിൽ ദേശീയ അന്വേഷണ ഏജൻസി (എൻഐഎ) കുറ്റപത്രം സമർപ്പിച്ചു. സ്ഫോടനത്തിൽ കൊല്ലപ്പെട്ട ഉമർ ഉൻ നബിയാണ് ഭീകരാക്രമണത്തിന്റെ പ്രധാന സൂത്രധാരനും നിരോധിത സംഘടനയായ അൻസാർ ഗസ്‌വത്-ഉൽ-ഹിന്ദിന്റെ ഓപ്പറേഷൻസ് തലവനുമെന്ന് എൻഐഎ കുറ്റപത്രത്തിൽ വ്യക്തമാക്കുന്നു.
അൽ-ഖ്വയ്ദയുമായി ബന്ധമുള്ള ഈ ഭീകര സംഘടനയെ വീണ്ടും സജീവമാക്കാനും ഡൽഹിയിലും ജമ്മു കാശ്മീരിലും ചെറുപ്പക്കാരെ തീവ്രവാദത്തിലേക്ക് ആകർഷിക്കാനും 2022 മുതൽ ഉമർ ഉൻ നബി പ്രവർത്തിച്ചിരുന്നതായി റിപ്പോർട്ട് ചൂണ്ടിക്കാട്ടുന്നു. യുവാക്കൾക്ക് ആയുധ പരിശീലനം നൽകുക, സ്ഫോടകവസ്തുക്കൾ ശേഖരിക്കുക, ഹവാല വഴിയും മറ്റും ഫണ്ട് സ്വരൂപിക്കുക തുടങ്ങിയവയാണ് ഇയാൾ ചെയ്ത് വന്നിരുന്നത്.
2025 നവംബർ 10-ന് വൈകിട്ട് 6:50-ഓടെ ചെങ്കോട്ടയ്ക്ക് സമീപം നിർത്തിയിട്ടിരുന്ന കാർ പൊട്ടിത്തെറിച്ചാണ് അപകടമുണ്ടായത്. ഇംപ്രൊവൈസ്ഡ് എക്‌സ്‌പ്ലോസീവ് ഡിവൈസ് (VBIED) ഘടിപ്പിച്ച കാറിനുള്ളിൽ വച്ചാണ് സ്ഫോടനം നടത്തിയത്. ഡിഎൻഎ (DNA) പരിശോധനയിലാണ് കൊല്ലപ്പെട്ടത് ഉമർ ഉൻ നബിയാണെന്ന് തിരിച്ചറിഞ്ഞത്. സംഭവസ്ഥലത്തുനിന്ന് ടിഎടിപി (TATP), അമോണിയം നൈട്രേറ്റ് തുടങ്ങിയ മാരകമായ സ്ഫോടകവസ്തുക്കളുടെ അംശങ്ങൾ കണ്ടെത്തിയിരുന്നു.
11 പേർ കൊല്ലപ്പെടുകയും 29 പേർക്ക് പരിക്കേൽക്കുകയും ചെയ്ത ഈ ആക്രമണത്തിന് പിന്നിൽ വൻ ഗൂഢാലോചനയാണെന്ന് എൻഐഎ വ്യക്തമാക്കി. ഉമർ ഉൻ നബി സ്ഫോടനത്തിൽ കൊല്ലപ്പെട്ടതിനാൽ ഇയാൾക്കെതിരെയുള്ള നിയമനടപടികൾ അവസാനിപ്പിച്ചിട്ടുണ്ടെങ്കിലും കേസിലെ മറ്റു പ്രതികൾക്കെതിരെ അന്വേഷണവും വിചാരണയും പുരോഗമിക്കുകയാണ്.
