ന്യൂദല്‍ഹി: കോണ്‍ഗ്രസ് നേതാവ് രാഹുലിനേക്കാള്‍ ജനകീയനാണ് പ്രധാനമന്ത്രി നരേന്ദ്രമോദിയെന്ന് കാര്‍ത്തി ചിദംബരം എംപി. കാരണം കാണിക്കല്‍ നോട്ടീസ് നല്കി കോണ്‍ഗ്രസ്. തമിഴ് വാര്‍ത്താ ചാനലിന് നല്കിയ അഭിമുഖത്തിലായിരുന്നു കോണ്‍ഗ്രസിനെ വെട്ടിലാക്കി കാര്‍ത്തിയുടെ പരാമര്‍ശം. ജനകീയതയില്‍ പ്രധാനമന്ത്രി നരേന്ദ്ര മോദിയാണ് മുന്നിലെന്നും രാഹുല്‍ വളരെ പിന്നിലാണെന്നുമായിരുന്നു കോണ്‍ഗ്രസ് എംപി തുറന്നുപറഞ്ഞത്. ഇതാണ് കോണ്‍ഗ്രസിനെ ചൊടിപ്പിച്ചത്.
ഇലക്ട്രോണിക് വോട്ടിങ് മെഷീനിന്റെ വിശ്വാസ്യതയെ കുറിച്ചും കാര്‍ത്തി ചിദംബരം അനുകൂല പരാമര്‍ശം ഇതേ അഭിമുഖത്തില്‍ നടത്തി. കോണ്‍ഗ്രസിന്റെ പ്രഖ്യാപിത നിലപാടില്‍ നിന്നും വ്യതിചലിച്ചു എന്നാരോപിച്ചാണ് ഇപ്പോള്‍ നോട്ടീസ് നല്കിയിരിക്കുന്നത്. കെആര്‍. രാമസ്വാമി അധ്യക്ഷനായ സമിതിയാണ് കാരണംകാണിക്കല്‍ നോട്ടീസ് നല്കിയിരിക്കുന്നത്. 10 ദിവസത്തിനകം വിശദീകരണം നല്കണമെന്നാണ് നിര്‍ദേശം.
തമിഴ്നാട് പിസിസി അധ്യക്ഷസ്ഥാനത്തേക്ക് കാര്‍ത്തി ചിദംബരത്തിന്റെ പേരും പരിഗണിക്കപ്പെട്ടിരുന്നു. പൊതു തെരഞ്ഞെടുപ്പിന് മുമ്പായി കാര്‍ത്തി സംസ്ഥാന ഘടകത്തിന്റെ അധ്യക്ഷനാകുമെന്ന തരത്തില്‍ റിപ്പോര്‍ട്ടുകളും പുറത്തുവന്നിരുന്നു. എന്നാല്‍ കാര്‍ത്തിയുടെ മോദി അനുകൂല പരാമര്‍ശം ഇതിനുള്ള സാദ്ധ്യതകള്‍ക്ക് മങ്ങലേല്‍പ്പിച്ചിരിക്കുകയാണ്.
