കൊല്ലം: കരിമ്പന തേങ്ങ വില്‍ക്കുന്ന നാടന്‍ പെണ്ണിലൂടെ കേരളത്തെ ഞെട്ടിച്ച കൊടുംകൊലപാതകം വേദിയില്‍ അവതരിപ്പിച്ച് പാലക്കാട് ഒറ്റപ്പാലം കെപിഎസ്എംഎംവിഎച്ച്എസ്എസിലെ പ്ലസ്ടു വിദ്യാര്‍ഥിനി സ്നേഹ. ആലുവയില്‍ കൊല്ലപ്പെട്ട ആറു വയസുകാരിയുടെ കഥയുടെ പശ്ചാത്തലമാണ് എച്ച്എസ്എസ് വിഭാഗം നാടോടിനൃത്ത മത്സര വേദിയില്‍ ഒറ്റപ്പാലം സ്വദേശിയായ സ്നേഹ സന്തോഷ് അവതരിപ്പിച്ചത്.
സമകാലിക പ്രസക്തിയുള്ള കഥയായതിനാലും കേരളത്തില്‍ കുട്ടികള്‍ക്കെതിരെ നടക്കുന്ന കൊടും ക്രൂരതകളുടെ അവതരണവും കാണികള്‍ പൂര്‍ണ മനസ്സോടെ ഏറ്റുവാങ്ങി. വര്‍ത്തമാന കാലത്ത് പെണ്‍കുട്ടികള്‍ നേരിടുന്ന വെല്ലുവിളികള്‍ ആര്‍ദ്രമാര്‍ന്ന ഭാവങ്ങളാലും വേദിയെ ഇളക്കി മറിക്കുന്ന നൃത്തച്ചുവടുകളാലും സ്നേഹ അവതരിപ്പിച്ചു. കരിമ്പന തേങ്ങ വില്‍ക്കുന്ന നാടന്‍ പെണ്ണായാണ് സ്നേഹ വേദിയിലെത്തിയത്. എന്നാല്‍ ആലുവയിലെ കൊലപാതക കഥയുടെ സാരാംശമാണ് കഥയില്‍ പ്രതിധ്വനിച്ചത്.
പാലക്കാട് ഒറ്റപ്പാലം കെപിഎസ്എംഎംവിഎച്ച്എസ്എസിലെ പ്ലസ്ടു വിദ്യാര്‍ഥിനിയായ സ്നേഹ. സന്തോഷ് സജിത ദമ്പതികളുടെ മകളാണ്. സഹോദരി: നേഹ സന്തോഷ്.
