ആലപ്പുഴ: സ്വന്തം നാട്ടിലെ സിപിഎം ഓഫീസ് ഉദ്ഘാടന ചടങ്ങില് നിന്ന് മുതിര്ന്ന നേതാവ് ജി. സുധാകരനെ ഒഴിവാക്കി. സുധാകരന് താമസിക്കുന്ന പുന്നപ്ര വടക്ക് ലോക്കല് കമ്മിറ്റി ഓഫീസിന്റെ ഉദ്ഘാടന ചടങ്ങില് നിന്നാണ് ഒഴിവാക്കിയത്. ജില്ലയിലെ ചില പ്രധാന നേതാക്കള് ഇടപെട്ടാണ് ഒഴിവാക്കിയതെന്നാണ് സൂചന. ജില്ലയില് ഇപ്പോഴും രൂക്ഷമായ വിഭാഗീയതയുടെ ഒടുവിലെ ഉദാഹരണമാണ് ജി സുധാകരന് നേരിടേണ്ടി വരുന്ന അവഗണ.
സുധാകരന്റെ വീടിന്റെ വിളിപ്പാടകലെ നടക്കുന്ന ചടങ്ങായിരുന്നിട്ടും അദ്ദേഹത്തെ ഒഴിവാക്കിയതില് വിമര്ശനം ഉയരുന്നു. പാര്ട്ടി പ്രവര്ത്തനത്തിലും വേദികളിലും സുധാകരന് സജീവമായിരുന്നു. എന്നാല് അമ്പലപ്പുഴ എംഎല്എ എച്ച്. സലാമടക്കമുള്ള നേതാക്കളുമായുള്ള അഭിപ്രായ ഭിന്നതകളാണ് മുതിര്ന്ന നേതാവിനെ തഴയുന്നതിന്റെ കാരണമായി ഒരു വിഭാഗം പാര്ട്ടി പ്രവര്ത്തകര് പറയുന്നത്.
ലോക്കല് കമ്മറ്റി ഓഫീസിന്റെ നിര്മ്മാണം അഞ്ച് മാസം മുന്പാണ് ആരംഭിച്ചത്. നിര്മ്മാണത്തോട് അനുബന്ധിച്ച് നടന്ന തറകല്ലിടല് ചടങ്ങിലും നേരത്തെ ജി സുധാകരന് ക്ഷണമുണ്ടായിരുന്നില്ല. സംസ്ഥാന സെക്രട്ടറിയേറ്റ് അംഗവും മന്ത്രിയുമായ സജി ചെറിയാന്, ജില്ലാ സെക്രട്ടറി ആര്. നാസര് അടക്കമുള്ള നേതാക്കള് പങ്കെടുത്ത ചടങ്ങിലാണ് ജില്ലയിലെ തന്നെ മുതുര്ന്ന നേതാവിനെ ഒഴിവാക്കിയത്.
അമ്പലപ്പുഴ ഏരിയയില് നേതൃതലത്തില് അടുത്തകാലത്തായി നിരവധി പ്രശ്നങ്ങളാണ് ഉയര്ന്നു വരുന്നത്, എംഎല്എയും ഏരിയ സെക്രട്ടറിയും അടങ്ങുന്ന കോക്കസാണ് പാ
ര്ട്ടിയെ അടക്കി ഭരിക്കുന്നതെന്നാണ് ആക്ഷേപം. ജില്ലയിലെ പാര്ട്ടിയിലെ അവസാനവാക്കായ മന്ത്രിയുടെ പിന്ബലമാണ് ഇവരുടെ കരുത്ത്. ഇതിന്റെയെല്ലാം തുടര്ച്ചയാണ് ജി. സുധാകരന് സ്വന്തം നാട്ടില് നേരിടുന്ന അവഗണന.
