അയോധ്യ: രാമജന്മഭൂമി തീര്ത്ഥക്ഷേത്ര ട്രസ്റ്റിലെ പ്രാണപ്രതിഷ്ഠാ ആഘോഷങ്ങള്ക്കായി സംഭാവനകള് പിരിക്കുന്നുവെന്ന വാര്ത്തകള് ജാഗ്രതയോടെ കാണണമെന്ന് വിശ്വഹിന്ദു പരിഷത്ത് ജനറല് സെക്രട്ടറി മിലിന്ദ് പരാണ്ഡെ. ഒരു പിരിവും ഇതിന്റെ പേരില് ഇല്ല. രസീതുമായി ചിലയിടങ്ങളില് സംഭാവന തേടുന്നു എന്ന വാര്ത്തകള് ശ്രദ്ധയില്പ്പെട്ടതിനെത്തുടര്ന്നാണ് പ്രതികരണം.
രാമക്ഷേത്രനിര്മാണത്തിനായി കോടാനുകോടി രാമഭക്തര് നിധിസമര്പ്പണം നടത്തിയിട്ടുണ്ട്. എല്ലാ മേഖലയിലുംപെട്ട ജനങ്ങള് ഈ നിര്മാണയജ്ഞത്തില് പങ്കാളികളാണ്. ശ്രീരാമജന്മഭൂമി ക്ഷേത്രത്തിന്റെ പ്രതിഷ്ഠാ പരിപാടികള്ക്കായി പ്രത്യേക സമിതി രൂപീകരിച്ച് പണം പിരിക്കാന് ആരെയും ചുമതലപ്പെടുത്തിയിട്ടില്ല. ജനങ്ങള് കബളിപ്പിക്കപ്പെടരുതെന്നും ജാഗ്രത പാലിക്കണമെന്നും മിലിന്ദ് പരാണ്ഡെ പത്രക്കുറിപ്പില് അറിയിച്ചു.
