ന്യൂദല്‍ഹി : സമാധാന പരമായി പ്രതിഷേധിക്കാന്‍ ജനാധിപത്യപരമായ അവകാശമുണ്ട്. എന്നാല്‍ എസ്എഫ്‌ഐ നടത്തിയ പ്രതിഷേധങ്ങളുടെ പേില്‍ മുഖ്യമന്ത്രിയെ കുറ്റപ്പെടുത്തുകയും അദ്ദേഹത്തിനെതിരെ ഗവര്‍ണര്‍ ആരിഫ് മുഹമ്മദ് ഖാന്‍ പരാമര്‍ശങ്ങള്‍ നടത്തിയെന്നും സിപിഎം പോളിറ്റ് ബ്യൂറോ. തെരഞ്ഞെടുക്കപ്പെട്ട സംസ്ഥാന സര്‍ക്കാരിനെതിരായ നിരന്തരമായ രാഷ്‌ട്രീയ ആക്രമണങ്ങളിലൂടെയും ക്രമരഹിതമായ പെരുമാറ്റത്തിലൂടെയും എല്ലാ അതിരുകളും ലംഘിച്ചെന്നും സിപിഎം കുറ്റപ്പെടുത്തി.
കേരള- കാലിക്കറ്റ് സര്‍വ്വകലാശാലകളിലെ സെനറ്റുകളിലെ നോമിനേറ്റഡ് സീറ്റുകളിലേക്ക് ആളുകളെ നോമിനേറ്റ് ചെയ്തതില്‍ ഗവര്‍ണര്‍ക്കെതിരെ വിദ്യാര്‍ത്ഥികള്‍ പ്രതിഷേധം സംഘടിപ്പിച്ചിരുന്നു. സമാധാനപരമായി പ്രതിഷേധിക്കാന്‍ വിദ്യാര്‍ത്ഥികള്‍ക്ക് ജനാധിപത്യപരമായ അവകാശമുണ്ടെങ്കിലും ഈ പ്രതിഷേധങ്ങളുടെ പേരില്‍ മുഖ്യമന്ത്രിയെ കുറ്റപ്പെടുത്താനും അദ്ദേഹത്തെ അപമാനിക്കുന്ന പരാമര്‍ശങ്ങള്‍ നടത്താനും ഗവര്‍ണര്‍ ശ്രമിച്ചു.ഗവര്‍ണര്‍ എന്ന ഭരണഘടനാ പദവി വഹിക്കുന്ന ഒരാള്‍ക്ക് ഇത് പെരുമാറാന്‍ കഴിയില്ല, ആ സ്ഥാനത്ത് തുടരാന്‍ താന്‍ യോഗ്യനല്ലെന്ന് അദ്ദേഹം തെളിയിച്ചുവെന്നും സിപിഎം പിബി പ്രസ്താവനയില്‍ കുറ്റപ്പെടുത്തി.
തനിക്ക് പോലീസ് സുരക്ഷ ആവശ്യമില്ലെന്ന് പറഞ്ഞ് കോഴിക്കോട് മാനാഞ്ചിറയിലേക്ക് താന്‍ ഇറങ്ങുകയാണെന്ന് ഗവര്‍ണര്‍ പ്രഖ്യാപിച്ചതിന് പിന്നാലെയാണ് പോളിറ്റ് ബ്യൂറോ പ്രസ്താവന ഇറക്കിയത്. തനിക്കെതിരെ ചെയ്യാനുള്ളവര്‍ക്ക് എന്തും ചെയ്യാം തനിക്ക് പോലീസ് സംരക്ഷണം ആവശ്യമില്ലെന്ന് ഡിജിപിയെ അറിയിച്ചശേഷമാണ് ഗവര്‍ണര്‍ മാനാഞ്ചിറയിലേക്ക് എത്തിയത്. അവിടെയെത്തിയ അദ്ദേഹം കുട്ടികളും പ്രദേശ വാസികളായ ജനങ്ങളോടും സംസാരിച്ചു.
