കോഴിക്കോട്: കോഴിക്കോട് ഓര്ക്കാട്ടേരിയിലെ ഷബ്നയുടെ ആത്മഹത്യയില് ഭര്ത്താവിന്റെ അമ്മ നബീസയെ പൊലീസ് അറസ്റ്റ് ചെയ്തു. ഷബ്നയുടെ ഭര്ത്താവിന്റെ അച്ഛനും സഹോദരിയും ഒളിവിലാണ് ഇപ്പോഴും.
അതേസമയം,നേരത്തെ അറസ്റ്റിലായ ഭര്ത്താവിന്റെ അമ്മാവന് ഹനീഫയുടെ ജാമ്യാപേക്ഷയും ഒളിവിലുള്ള പ്രതികളുടെ മുന്കൂര് ജാമ്യാപേക്ഷയും കോടതി ഉടന് പരിഗണിക്കും
ആയഞ്ചേരി സ്വദേശിനി ഷബ്ന ഓര്ക്കാട്ടേരിയിലെ ഭര്തൃവീട്ടില് ജീവനൊടുക്കിയ സംഭവത്തില് ഭര്ത്താവിന്റെ അമ്മാവനായ ഹനീഫയെ മാത്രമായിരുന്നു പൊലീസ് ആദ്യം പ്രതി ചേര്ത്തത്. ഹനീഫ ഷബ്നയെ മര്ദ്ദിക്കുന്ന ദൃശ്യങ്ങള് പുറത്തു വന്നതോടെയാണ് ഇയാളെ അറസ്റ്റ് ചെയ്തത്.
എന്നാല് മറ്റ് ബന്ധുക്കളെ പ്രതി ചേര്ക്കാന് പൊലീസ് തയാറാകാത്തതില് പ്രതിഷേധം ശക്തമായതിന് പിന്നാലെയാണ് ഷബ്നയുടെ ഭര്തൃപിതാവ് മഹമൂദ് ഹാജി, മാതാവ് നബീസ, സഹോദരി ഹഫ്സത്ത് എന്നിവരെ കേസില് പ്രതി ചേര്ത്തത്. ഗാര്ഹിക പീഡന നിരോധനനിയമം, സ്ത്രീധന നിരോധന നിയമം, ആത്മഹത്യാ പ്രേരണാ കുറ്റം തുടങ്ങിയ വകുപ്പുകളാണ് ഇവര്ക്കെതിരെയുളളത്.
ഷബ്നയുടെ ഭര്ത്താവിന് മരണത്തില് പങ്കുണ്ടോയെന്ന കാര്യം അന്വേഷിക്കുന്നുണ്ട്. ഷബ്നയെ ഭര്തൃവീട്ടില് മരിച്ച നിലയില് കണ്ടെത്തിയത് ഈ മാസം നാലിനാണ്.
