പത്തനംതിട്ട: സന്നിധാനത്ത് അയ്യപ്പ ഭക്തരുടെ തിരക്കിൽ നേരിയ തോതിൽ കുറവ്. അഞ്ച് ദിവസത്തോളം നീണ്ടു നിന്ന പ്രതിസന്ധിയ്‌ക്കാണ് ചെറിയ ആശ്വാസമായിരിക്കുന്നത്. ഇന്ന് രാവിലെ മുതൽ ഭക്തരുടെ തിരക്കിന് അൽപ്പം കുറവ് വന്നിട്ടുണ്ട്.
എന്നാൽ നിലയ്‌ക്കലിൽ നിന്നും പമ്പയിലേക്കുള്ള കെഎസ്ആർടിസിയുടെ ചെയിൻ സർവീസിൽ ഉൾപ്പെടെ കയറുന്നതിനുള്ള അയ്യപ്പ ഭക്തരുടെ ബുദ്ധിമുട്ടിന് ഇനിയും ഫലം കണ്ടിട്ടില്ല. ഗതാഗതക്കുരുക്ക് നിയന്ത്രണ വിധേയമായതോടെ ബസ് സർവീസ് സാധരണ നിലയിലായി. കൂടുതൽ ബസ് സർവീസുകളുൾപ്പെടെ നിലയ്‌ക്കലിൽ നിന്നും പമ്പയിലേക്കും തിരിച്ചും സർവീസ് നടത്തുന്നുണ്ട്.
അതേസമയം സന്നിധാനത്തെ തിരക്ക് നിയന്ത്രണവിധേയമാക്കുന്നതുമായി ബന്ധപ്പെട്ട് സ്വമേധയാ എടുത്ത കേസ് ഹൈക്കോടതി ഇന്ന് വീണ്ടും പരിഗണിക്കും. നിലവിലെ സ്ഥിതിഗതികളും സർക്കാർ സ്വീകരിച്ചിട്ടുള്ള സംവിധാനങ്ങളും പരിശോധിക്കുകയാണ് ഇതിലൂടെ ലക്ഷ്യം.
