ന്യൂദല്‍ഹി: ചോദ്യം ചോദിക്കാന്‍ കോഴ വാങ്ങിയതിന് ലോക്സഭയില്‍ നിന്ന് പുറത്താക്കിയ തൃണമൂല്‍ കോണ്‍ഗ്രസ് എംപി മഹുവ മൊയ്ത്രയോട് ദല്‍ഹിയിലെ ഔദ്യോഗിക വസതി ഒഴിയാന്‍ നിര്‍ദേശം. മഹുവയ്‌ക്ക് ഔദ്യോഗിക വസതി ഒഴിയാന്‍ നിര്‍ദേശം നല്‍കണമെന്ന് പാര്‍ലമെന്റിന്റെ ഹൗസിങ് കമ്മിറ്റി ഭവന, നഗരകാര്യ മന്ത്രാലയത്തോട് ഔദ്യോഗികമായി ആവശ്യപ്പെട്ടു. ഡിസംബര്‍ എട്ടിനാണ് തൃണമൂല്‍ കോണ്‍ഗ്രസ് എംപിയായിരുന്ന മഹുവ മൊയ്ത്രയെ ലോക്സഭയില്‍ നിന്ന് പുറത്താക്കിയത്.
ചോദ്യം ചോദിക്കാന്‍ കോഴ വാങ്ങിയെന്ന ബിജെപി എംപി നിഷികാന്ത് ദുബെ നല്‍കിയ പരാതി പരിശോധിച്ച എത്തിക്സ് കമ്മിറ്റി നല്‍കിയ റിപ്പോര്‍ട്ടിന്റെയും ശിപാര്‍ശയുടെയും അടിസ്ഥാനത്തിലായിരുന്നു നടപടി. ഇതിനെതിരെ മഹുവ മൊയ്ത്ര സുപ്രീംകോടതിയെ സമീപിച്ചിട്ടുണ്ട്.
