പത്തനംതിട്ട: പത്തനംതിട്ട കൊടുമണ്ണിൽ ഒമ്പതാം ക്ലാസുകാരിയെ തട്ടിക്കൊണ്ടുപോയ കേസില് നാല് പേർ പിടിയിൽ. പെൺകുട്ടിയുമായി പോകും വഴി പ്രതികൾ സഞ്ചരിച്ച വാഹനം കേടാവുകയും പോലീസിന്റെ പിടിയിലാവുകയുമായിരുന്നു. തട്ടിക്കൊണ്ട് പോകലിന് ഇവർക്കെതിരെ കേസെടുത്തിട്ടുണ്ട്.
പ്രതികളിൽ ഒരാൾ പെൺകുട്ടിയുമായി അടുപ്പമുള്ള ആളാണെന്ന് പോലീസ് പറയുന്നു. ഇലവുംതിട്ട സ്വദേശികളായ അരുൺ, ബിജു, അജി ശശി, അഭിഷിക് എന്നിവരാണ് പിടിയിലായത്. കഴിഞ്ഞ ദിവസം രാത്രി വീട്ടിൽ നിന്നാണ് നാലാംഗ സംഘം 14 കാരിയെ തട്ടിക്കൊണ്ടുപോയത്. പെൺകുട്ടിയെ മാതാപിതാക്കൾക്ക് കൈമാറി. വെള്ളിയാഴ്ച വൈകിട്ടായിരുന്നു സംഭവം.
വീണ് പരിക്കേറ്റ് ചികിത്സയിലായിരുന്ന പെൺകുട്ടിയുടെ അച്ഛനെ കാണാനെന്ന വ്യാജേന വീട്ടിലെത്തിയ ശേഷം ഇവർ കുട്ടിയുമായി കടന്നുകളയുകയായിരുന്നു. പെണികുട്ടിയെ കാണാതായ ഉടൻ തന്നെ ബന്ധുക്കൾ പോലീസിൽ പരാതി നൽകുകയായിരുന്നു. പോലിസ് നടത്തിയ തെരച്ചിലിനിടെയാണ് പ്രതികൾ പിടിയിലാകുന്നത്.
