കൊച്ചി: കേരളത്തിലെത്തിയ ധനമന്ത്രി നിർമ്മലാ സീതാരാമൻ കൊച്ചിയിൽ നിന്നും തിരുവനന്തപുരത്തേക്കുള്ള യാത്രയ്ക്കായി തെരഞ്ഞെടുത്തത് വന്ദേഭാരത് എക്സ്പ്രസ്. ട്രെയിനിലെ യാത്രക്കാരുമായി സംസാരിക്കുന്ന ചിത്രങ്ങൾ മന്ത്രി തന്നെയാണ് എക്സിൽ പങ്കുവച്ചത്.
കാസർകോട് നിന്നും പുറപ്പെട്ട വന്ദേഭാരതിൽ എറണാകുളത്ത് വച്ചാണ് മന്ത്രി കയറിയത്. യാത്രാക്കാരുമായി സംവദിക്കാൻ കിട്ടിയ ഏറ്റവും മികച്ച അവസരം എന്ന് കുറിച്ചുകൊണ്ടാണ് നിർമ്മലാ സീതാരാമൻ സോഷ്യൽ മീഡിയയിൽ ചിത്രങ്ങൾ പങ്കുവച്ചത്. ചിത്രങ്ങൾ സോഷ്യൽ മീഡിയയിൽ വൈറലാണ്.
‘കൊച്ചിയിൽ നിന്നും തിരുവനന്തപുരത്തേക്ക് വന്ദേഭാരതിൽ ഒരു യാത്ര നടത്തുന്നു. പ്രധാനമന്ത്രി നരേന്ദ്ര മോദി 2022 സെപ്റ്റംബറിലാണ് വന്ദേഭാരത് എക്സ്പ്രസ് അവതരിപ്പിച്ചത്. എനിക്ക് യാത്ര ചെയ്യാൻ ഒരു വർഷം കാത്തിരിക്കേണ്ടി വന്നു. എല്ലാ സീറ്റുകളും ബുക്ക്ഡ് ആണ്. വന്ദേഭാരത് അത്രയ്ക്കും ജനപ്രിയമാണ്’- നിർമ്മലാ സീതാരാമൻ എക്സിൽ കുറിച്ചു.
ഒരു ദിവസത്തെ സന്ദർശനത്തിനാണ് മന്ത്രി തിരുവനന്തപുരത്തെത്തിയത്. ഇന്നലെ കൊച്ചിയിലെത്തിയ കേന്ദ്രമന്ത്രി, ആദായനികുതി വകുപ്പിന്റെ ആയകർ ഭവൻ ഉദ്ഘാടനത്തിന് ശേഷമാണ് തലസ്ഥാനത്തെത്തുന്നത്. രാവിലെ 11ന് ആറ്റിങ്ങലിൽ കേന്ദ്ര ധനസഹായ വിതരണ ചടങ്ങിലും വൈകിട്ട് 4.30ന് ഹയാത്ത് റീജൻസിയിൽ കേരളകൗമുദി നടത്തുന്ന ‘എമർജിംഗ് ഭാരത്, ഗ്രോയിംഗ് കേരള’ ബിസിനസ് കോൺക്ലേവിലും പങ്കെടുക്കും.
