തിരുവനന്തപുരം: ലക്ഷക്കണക്കിന് ജനങ്ങള് പങ്കെടുത്ത വര്ണ്ണാഭമായ ഓണാഘോഷ സമാപനത്തിന് പിന്നാലെ തലസ്ഥാന നഗരിയെ മണിക്കൂറുകള്ക്കകം പൂര്വ്വസ്ഥിതിയിലാക്കി നഗരസഭ. സംസ്ഥാന സര്ക്കാര് സംഘടിപ്പിച്ച ടൂറിസം വാരാഘോഷത്തിന്റെ ഭാഗമായി ലക്ഷക്കണക്കിന് ജനങ്ങളാണ് എഴ് ദിവസങ്ങളിലായി നഗരത്തിലേക്ക് ഒഴുകിയെത്തിയത്. ആഘോഷങ്ങളുടെ ആവേശം ഒടുങ്ങിയതിന് തൊട്ടുപിന്നാലെ, ശുചീകരണ തൊഴിലാളികള്ക്കൊപ്പം നേരിട്ട് രംഗത്തിറങ്ങി നഗരം വൃത്തിയാക്കാന് നേതൃത്വം നല്കി മേയര് വി.വി. രാജേഷും ഡെപ്യൂട്ടി മേയര് ആശാനാഥും ആരോഗ്യ സ്റ്റാന്ഡിംഗ് കമ്മറ്റി ചെയര്പേഴ്സണ് എം.ആര്. ഗോപനും. ജനപ്രതിനിധികളുടെ ഈ മാതൃകാപരമായ പ്രവര്ത്തനം ഇതിനോടകം വലിയ പ്രശംസയാണ് പിടിച്ചുപറ്റിയത്.
ആഘോഷം സമാപിച്ച അന്ന് രാത്രി തന്നെ നഗരം പൂര്ണ്ണമായും വൃത്തിയാക്കുക എന്ന ലക്ഷ്യത്തോടെ ഹരിതകര്മ്മ സേനയും ശുചീകരണ തൊഴിലാളികളും ഒരേ മനസ്സോടെ രംഗത്തിറങ്ങുകയായിരുന്നു. നഗര ശുചീകരണത്തിനായി മാത്രം 140 തൊഴിലാളികളെയാണ് പ്രത്യേകമായി നിയോഗിച്ചിരുന്നത്. കവടിയാര് മുതല് കിഴക്കേകോട്ട വരെയുള്ള പ്രദേശം വെറും മൂന്ന് മണിക്കൂറിനുള്ളില് പൂര്ണ്ണമായും വൃത്തിയാക്കി. ആഘോഷവേദികളില് നിന്നും പരിസരങ്ങളില് നിന്നുമായി ടണ് കണക്കിന് ജൈവഅജൈവ മാലിന്യങ്ങള് വേര്തിരിച്ച് ശേഖരിച്ചു.
ഘോഷയാത്ര സമാപിച്ചതിന് ശേഷം രാത്രി ഒന്പത് മണിയോടെ കവടിയാര് മുതല് കിഴക്കേകോട്ട വരെയുള്ള റോഡിനിരുവശവും ശുചീകരിക്കുന്നതിനായി ഹരിത കര്മ്മ സേനാംഗങ്ങളും സ്ഥിരം തൊഴിലാളികളും സജീവമായി ജോലികളില് പ്രവേശിച്ചു. മേയര് വി.വി. രാജേഷ്, ഡെപ്യൂട്ടി മേയര് ആശാനാഥ്, ആരോഗ്യകാര്യ സ്റ്റാന്ഡിംഗ് കമ്മറ്റി ചെയര്പോഴ്സണ് എം.ആര്. ഗോപന്, നഗരസഭാ സെക്രട്ടറി ജെ. മുഹമ്മദ് ഷാഫി, മറ്റ് കൗണ്സിലര്മാര് എന്നിവരും ശുചീകരണ പ്രവര്ത്തനങ്ങള്ക്ക് നേതൃത്വം നല്കി. ജീവനക്കാര്ക്കൊപ്പം തോളോട് തോള് ചേര്ന്ന് പ്രവര്ത്തിച്ച വിവരം മേയര് തന്റെ ഔദ്യോഗിക ഫേസ്ബുക്ക് പേജിലൂടെയും പങ്കുവച്ചിരുന്നു.
ഓണാഘോഷം ആരംഭിച്ച ദിവസം മുതല് നടന്ന രാത്രികാല ശുചീകരണങ്ങള്ക്കൊപ്പം, ശുചിത്വമിഷന്റെ സഹകരണത്തോടെ വിവിധ വേദികളില് പ്രത്യേക ബിന്നുകള് സ്ഥാപിച്ചു. ഭക്ഷ്യമേളകളില് പ്ലാസ്റ്റിക് ഉപയോഗം കര്ശനമായി ഒഴിവാക്കി പുനരുപയോഗിക്കാവുന്ന പാത്രങ്ങള് ഉറപ്പാക്കിയിരുന്നു.
ലക്ഷക്കണക്കിന് ആളുകള് പങ്കെടുത്ത വലിയൊരു ആഘോഷത്തിന് ശേഷം നഗരത്തിന്റെ ഭംഗിയും വൃത്തിയും ഒട്ടും ചോര്ന്നുപോകാതെ അതിവേഗം പുനഃസ്ഥാപിക്കാന് കഴിഞ്ഞത് നഗരവാസികള്ക്കും ഏറെ കൗതുകമുണര്ത്തുന്ന അനുഭവമായി. മാതൃകാപരമായ ഈ മാലിന്യ സംസ്കരണ പ്രവര്ത്തനത്തിലൂടെ തലസ്ഥാന ജനതയുടെയും സാമൂഹിക നിരീക്ഷകരുടെയും വലിയ അഭിനന്ദനങ്ങളാണ് നഗരസഭ നേടിയെടുത്തിരിക്കുന്നത്.
