കോഴിക്കോട് : യൂത്ത് കോണ്ഗ്രസ് തെരഞ്ഞെടുപ്പില് വ്യാജ തിരിച്ചറിയില് കാര്ഡ് കേസില് അന്വേഷണം ശക്തമാകുന്നു. കേസില് പിടിയിലായവരില് നിന്നും 24 ഓളം വ്യാജ തിരിച്ചറിയല് കാര്ഡുകളാണ് പിടികൂടിയത്.
വ്യാജതിരിച്ചറിയല് കാര്ഡുമായി ബന്ധപ്പെട്ട് പിടിയിലായവര് സംസ്ഥാന അധ്യക്ഷന് രാഹുല് മാങ്കൂട്ടത്തിലിന്റെ വിശ്വസ്തരാണ്. അബി വിക്രം, ബിനില് ബിനു, ഫെന്നി, അടൂര് സ്വദേശി വികാസ് കൃഷ്ണ എന്നിങ്ങനെ നാല് പേരാണ് നിലവില് കസ്റ്റഡിയിലുള്ളത്. ഇവരെ പോലീസ് ചോദ്യം ചെയ്യുകയാണ്. ഇവരുടെ ലാപ്ടോപ്പും മൊബൈലും ഉപയോഗിച്ച് വ്യാജ തിരിച്ചറിയല് രേഖയുണ്ടാക്കിയെന്നാണ് സംശയം. ഇവരുടെ വീടുകളില് പോലീസ് പരിശോധന നടത്തുകയും ലാപ്ടോപ് അടക്കം പിടിച്ചെടുക്കുകയും ചെയ്തിരുന്നു. ഇതില് നിന്നും വ്യാജ രേഖകള് സംബന്ധിച്ച തെളിവുകള് ലഭിച്ചതായും റിപ്പോര്ട്ടില് പറയുന്നുണ്ട്.
ശാസ്ത്രീയ പരിശോധനകള്ക്ക് വിധേയമാക്കിയശേഷം തുടര് നടപടി സ്വീകരിക്കും.
അതേസമയം വ്യാജ രേഖ കേസില് രാഹുല് മാങ്കൂട്ടത്തിനോട് അടുപ്പമുള്ളവര് കസ്റ്റഡിയിലായത് ഗ്രൂപ്പിനുള്ളിലെ പോര് കാരണമെന്നും ആരോപണം ഉയര്ന്നിട്ടുണ്ട്. ഗ്രൂപ്പിനുള്ളില് നിന്നാണ് പോലീസിന് വിവരങ്ങള് ചോര്ത്തി നല്കിയത്. അന്വേഷണം സംസ്ഥാന പ്രസിഡന്റിലേക്ക് എത്തിക്കാന് നീക്കം നടക്കുന്നുണ്ടെന്നാണ് എ ഗ്രൂപ്പിനുള്ളിലെ ഒരു വിഭാഗത്തിന്റെ വിലയിരുത്തല്.
