കണ്ണൂര്‍: ഓണ്‍ലൈനായി പാര്‍ട്ട് ടൈം ജോലിവാഗ്ദാനം ചെയ്ത് പണം തട്ടുന്ന സംഭവം കണ്ണൂര്‍ ജില്ലയില്‍ വര്‍ധിക്കുന്നു. കഴിഞ്ഞ ആറ് മാസത്തിനിടെ മൂന്ന് കോടി രൂപ ജില്ലയില്‍ പലര്‍ക്കായി നഷ്ടപ്പെട്ടിട്ടുണ്ടെന്ന് സൈബര്‍ പോലീസ് വ്യക്തമാക്കി.
ഓണ്‍ലൈന്‍ പാര്‍ട്ട് ടൈം ജോലിവാഗ്ദാനത്തിനു പിന്നിലെ വന്‍ തട്ടിപ്പിനെ കുറിച്ച് സൈബര്‍ പോലീസ് പലതവണ മുന്നറിയിപ്പ് നല്‍കിയിട്ടും ഉന്നത ഉദ്യോഗസ്ഥര്‍ പോലും ഇവരുടെ കെണിയില്‍ വീഴുകയാണ്. അടുത്തിടെ കണ്ണൂരിലെ സര്‍ക്കാര്‍ ഉന്നത ഉദ്യോഗസ്ഥയ്‌ക്ക് 59 ലക്ഷമാണ് നഷ്ടമായത്. എല്ലാ വിഭാഗത്തില്‍പ്പെട്ടവരും തട്ടിപ്പിനിരകളാകുന്നുണ്ടെന്നും പോലീസ് പറഞ്ഞു.
വിദ്യാര്‍ത്ഥികള്‍, വീട്ടമ്മമാര്‍, സ്വകാര്യ സ്ഥാപനങ്ങളിലെ ജീവനക്കാര്‍, സര്‍ക്കാര്‍ ഉദ്യോഗസ്ഥര്‍, സോഫ്റ്റ് വെയര്‍ എഞ്ചിനീയര്‍മാര്‍ എന്നിവര്‍ക്കെല്ലാം വന്‍തുക ജില്ലയില്‍ നഷ്ടമായിട്ടുണ്ട്. യൂട്യൂബില്‍ ചാനലുകള്‍ക്ക് ലൈക്ക് കൊടുക്കല്‍, ഫിലിം റിവ്യൂ, ഹോട്ടലുകള്‍ക്ക് റേറ്റിംഗ് നല്‍കല്‍ എന്നിങ്ങനെയാണ് തുടക്കം. പിന്നീട് ഇരയുടെ വിശ്വാസ്യത നേടിയശേഷം പ്രീമിയം കാറ്റഗറിയില്‍ ഉള്‍പ്പെടുത്തി ടെലിഗ്രാം അക്കൗണ്ടിലേക്ക് ലിങ്ക് നല്‍കി അതില്‍ ജോലി ചെയ്യാന്‍ ആവശ്യപ്പെടും.
ഒരു ഗ്രൂപ്പുണ്ടാക്കി ഇരയെ ആ ഗ്രൂപ്പില്‍ ചേര്‍ക്കുകയും പിന്നീട് 10,000 രൂപയുടെ ടാസ്‌ക് നല്‍കി ക്രിപ്‌റ്റോ കറന്‍സിയില്‍ പണം നിക്ഷേപിക്കാന്‍ ആവശ്യപ്പെടുകയും ചെയ്യും. 15,000 രൂപ വരെ ഇരയുടെ അക്കൗണ്ടിലേക്ക് ക്രെഡിറ്റ് ചെയ്ത് നല്‍കുന്നതോടെ 50,000, ഒരു ലക്ഷം വരെ നിക്ഷേപിക്കാന്‍ പറയും.
തട്ടിപ്പുകാര്‍ ഇരയുടെ അക്കൗണ്ടിലേക്ക് വലിയൊരു തുക ക്രെഡിറ്റ് ചെയ്തതിന്റെ വ്യാജ രേഖയും സ്‌ക്രീന്‍ ഷോട്ടും കാണിക്കും. ഈ തുക തിരിച്ചെടുക്കാന്‍ കഴിയാതെ വരുമ്പോള്‍ വീണ്ടും പണം നിക്ഷേപിക്കാന്‍ ആവശ്യപ്പെടും. അവസാനം വലിയ ഒരു തുക തന്നെ സാധാരണക്കാര്‍ക്ക് നഷ്ടമാകും.
ക്രിപ്‌റ്റോ കറന്‍സിയുടെ പേരില്‍ കഴിഞ്ഞ ദിവസം രാത്രി യുവാവിന് 93,000 രൂപയാണ് നഷ്ടപ്പെട്ടത്. വിവിധ സര്‍വ്വീസ് നമ്പറുകള്‍ക്കായി ഗൂഗിള്‍ സെര്‍ച്ച് നടത്തുന്നതു വഴിയും ആളുകള്‍ പറ്റിക്കപ്പെടുന്നുണ്ട്. ഗൂഗിളില്‍ നല്‍കിയിരിക്കുന്ന സര്‍വ്വീസ് നമ്പറുകള്‍ തിരുത്താനുള്ള സാധ്യതയാണ് തട്ടിപ്പുകാര്‍ വ്യാപകമായി ഉപയോഗപ്പെടുത്തുന്നത്. ഹോട്ടലുകള്‍, ബാങ്കുകള്‍ ഉള്‍പ്പെടെയുള്ള സ്ഥാപനങ്ങളുടെ കസ്റ്റമര്‍ കെയര്‍ നമ്പറുകള്‍ തിരുത്തി വന്‍ തട്ടിപ്പുകള്‍ നടത്തുന്നുണ്ട്.
എസ്ബിഐയില്‍ നിന്ന് വിരമിച്ച ഉന്നത ഉദ്യോഗസ്ഥന് ഗൂഗിളില്‍ ബാങ്കിന്റെ തന്നെ സൈറ്റില്‍ കയറി രജിസ്റ്റര്‍ ചെയ്തപ്പോള്‍ നഷ്ടമായത് ലക്ഷങ്ങളാണ്. ബാങ്കുകളുടെയും മറ്റ് സര്‍ക്കാര്‍ സ്ഥാപനങ്ങളുടെയും സൈറ്റില്‍ കയറുമ്പോള്‍ യുആര്‍എല്‍ വ്യക്തമായി പരിശോധിക്കണമെന്നും പോലീസ് മുന്നറിയിപ്പ് നല്‍കുന്നുണ്ട്. വിവിധ ആപ്പുകള്‍ വഴി തട്ടിപ്പു സംഘങ്ങള്‍ വ്യാജ സൈറ്റുകളും സൃഷ്ടിക്കുന്നുണ്ട്. കൂടുതലായും ഓണ്‍ലൈന്‍ ജോലി വാഗ്ദാനത്തിന്റെ പേരിലാണ് തട്ടിപ്പ്.
രണ്ടാമത് ഗൂഗിള്‍ സര്‍ച്ചും പിന്നീട് ക്രിപ്‌റ്റോ കറന്‍സിയുടെ മറവിലുമാണ് തട്ടിപ്പ്. പറ്റിക്കപ്പെട്ടൂവെന്ന് മനസ്സിലായാല്‍ തിടുക്കമോ വെപ്രാളമോ വേണ്ട. 1930 എന്ന നാഷണല്‍ സൈബര്‍ ക്രൈംപോര്‍ട്ടലില്‍ ബന്ധപ്പെടുക.
ഇന്ത്യയിലെവിടെ നടന്ന തട്ടിപ്പും ഈ നമ്പറിലേക്ക് വിളിച്ച് പരാതിപ്പെടാം. പോലീസ് സ്റ്റേഷനിലേക്കോ ബാങ്കുകളിലേക്കോ പോയി സമയം നഷ്ടപ്പെടുത്തേണ്ടതില്ല. www.cybercrime.org എന്ന വെബ്സൈറ്റിലും പരാതി രജിസ്റ്റര്‍ ചെയ്യാം.
