തിരുവനന്തപുരം: മുഖ്യമന്ത്രി പിണറായി വിജയന്റെ സോഷ്യല് മീഡിയ സംഘത്തിന്റെ കരാര് ഒരു വര്ഷത്തേക്ക് കൂടി നീട്ടി. പ്രതിമാസം 6.67 ലക്ഷം രൂപയാണ് ശമ്പളത്തിന് മാത്രം ഇവര്ക്കുവേണ്ടി ചെലവാകുന്നത്. ടീം ലീഡര് ടി. മുഹമ്മദ് യഹിയക്ക് 75000 രൂപയാണ് മാസ ശമ്പളം.
കണ്ടന്റ് മാനേജര് സുദീപ്.ജെ സലീമിന് 70000, സീനിയര് വെബ് അഡ്മിനിസ്ട്രേറ്റര് ആര്.കെ. സന്ദീപ്, സോഷ്യല് മീഡിയ കോഡിനേറ്റര് ആര്. വിഷ്ണു, കണ്ടന്റ് സ്ട്രാറ്റജിസ്റ്റ് ഷഫീഖ് സല്മാന്.കെ എന്നിവര്ക്ക് 65000 രൂപ വീതം എന്നിങ്ങനെയാണ് പ്രധാനചുമതലകളിലുള്ളവരുടെ ശമ്പളം. സര്ക്കാരിന്റെ നേട്ടങ്ങള് പൊതുജനത്തെ അറിയിക്കാന് പിആര്ഡി വിഭാഗത്തില് നൂറോളം ഉദ്യോഗസ്ഥര് ജോലി ചെയ്യുമ്പോഴാണ് ഭീമമായ ശമ്പളത്തിൽ കരാര് അടിസ്ഥാനത്തില് സോഷ്യല് മീഡിയ സംഘം മുഖ്യമന്ത്രിക്കായി പ്രവര്ത്തിക്കുന്നത്.
മുഖ്യമന്ത്രിയുടെ ഫേസ്ബുക്ക് പേജ് അടക്കമുള്ള സമൂഹമാദ്ധ്യമങ്ങളില് പോസ്റ്റ് ചെയ്യുക, വെബ്സൈറ്റ് അപ്ഡേറ്റ് ചെയ്യുക എന്നിവ മാത്രമാണ് ഈ സംഘത്തിന്റെ ചുമതല. സംഘത്തില് ഏറ്റവും കുറവ് ശമ്പളം 22290 രൂപ കൈപ്പറ്റുന്ന കമ്പ്യൂട്ടര് അസിസ്റ്റന്റിനാണ്. പിണറായി കഴിഞ്ഞ തവണ മുഖ്യമന്ത്രിയായപ്പോള് സോഷ്യല് മീഡിയാ സംഘത്തില് ഒന്പതുപേരാണ് ഉണ്ടായിരുന്നത്. എന്നാല് ഇപ്പോള് അത് പന്ത്രണ്ടായി വര്ദ്ധിക്കുകയായിരുന്നു.
