തിരുവനന്തപുരം: കടുത്ത സാമ്പത്തിക പ്രതിസന്ധിയിലുഴലുന്ന സംസ്ഥാന സര്‍ക്കാര്‍, മന്ത്രിമാരുടെ നാടുസന്ദര്‍ശന പരിപാടി, നവ കേരള സദസ്സും ആര്‍ഭാടമാക്കുന്നു. പണമില്ലാത്തതിനാല്‍ സഹകരണ സംഘങ്ങള്‍ വഴി അതു കണ്ടെത്താനാണ് സര്‍ക്കാര്‍ നിര്‍ദേശം. ആവശ്യത്തിനു പണം ചെലവഴിക്കാന്‍ സഹകരണ സംഘങ്ങളോടു പറഞ്ഞുകഴിഞ്ഞു.
കരുവന്നൂര്‍ അടക്കം പല സഹകരണ സംഘങ്ങളിലും വലിയ തട്ടിപ്പു നടക്കുന്നു. ഇതുമൂലമുള്ള പ്രതിസന്ധികളാലും സഹകരണ സംഘങ്ങളെപ്പറ്റി ജനങ്ങള്‍ക്കുള്ള ആശങ്കയാലും സഹകരണ ബാങ്കുകള്‍ പ്രശ്നങ്ങളിലാണ്. അപ്പോഴാണ്, നവ കേരള സദസ്സിന് പണമിറക്കാന്‍ സര്‍ക്കാര്‍ നിര്‍ദേശം. സഹകരണ സംഘം രജിസ്ട്രാര്‍ ഇതാവശ്യപ്പെട്ട് സര്‍ക്കുലര്‍ അയച്ചു. സാമ്പത്തിക പ്രതിസന്ധി ഘട്ടത്തില്‍ സഹകരണ സംഘങ്ങളില്‍ നിന്ന് പണമൂറ്റുന്നത് അവയെ തകര്‍ക്കും. ഇതിനു പുറമേ തദ്ദേശ സ്വയംഭരണ സ്ഥാപനങ്ങള്‍ പണം നല്കാനും സര്‍ക്കാര്‍ ഉത്തരവുണ്ട്. വികസനകാര്യങ്ങള്‍ക്കു പോലും തനതു ഫണ്ടില്ലാതെ തദ്ദേശ സ്ഥാപനങ്ങള്‍ വലയുമ്പോഴാണീ നിര്‍ദേശം.
