ചെന്നൈ: തമിഴ്നാട് തൂത്തുക്കുടിയില് നവദമ്പതികളെ വീടിനുള്ളില് കയറി വെട്ടിക്കൊന്ന സംഭവത്തില് പെണ്കുട്ടിയുടെ അച്ഛന് അറസ്റ്റില്. തൂത്തുക്കുടി മുരുകേശന് നഗര് സ്വദേശിയായ വസന്തകുമാറിന്റെ മകന് മാരിസെല്വവും തിരുവിക്നഗര് സ്വദേശി മുത്തുരാമലിംഗത്തിന്റെ മകള് കാര്ത്തികയുമാണ് കൊല്ലപ്പെട്ടത്.
സംഭവത്തില് പെണ്കുട്ടിയുടെ അച്ഛന് മുത്തുരാമലിംഗത്തെയാണ് പോലീസ് ഇന്നലെ പിടികൂടിയത്. ഇയാളുടെ ബന്ധുക്കളായ കറുപ്പസാമി, ഭരത് ഉള്പ്പെടെ 3 പേര്ക്കെതിരെ കേസെടുത്തു. ഇവര്ക്കായി തെരച്ചില് തുടരുകയാണ്. സംഭവത്തില് പങ്കുണ്ടെന്ന് സംശയിക്കുന്ന ഒരാളെ ചോദ്യം ചെയ്തു.
ഏറെനാളായി പ്രണയത്തിലായിരുന്ന മാരിസെല്വവും കാര്ത്തികയും മൂന്ന് ദിവസം മുമ്പാണ് വിവാഹം കഴിച്ചത്. താഴ്ന്ന ജാതിക്കാരനും സാമ്പത്തികമായി പിന്നാക്കം നില്ക്കുന്ന മാരിസല്വത്തെ വിവാഹം കഴിച്ചതാണ് കൊലപാതകത്തില് കലാശിച്ചത്. വിവാഹത്തെ കാര്ത്തികയുടെ വീട്ടുകാര് എതിര്ത്തിരുന്നു.
ഒക്ടോബര് 30 നാണ് കാര്ത്തിക സ്വന്തം വീട് വിട്ടിറങ്ങിയത്. വിവാഹം കഴിഞ്ഞ ശേഷം തൂത്തുക്കുടി മുരുകേശന് നഗറിലെ മാരിസെല്വത്തിന്റെ മാതാപിതാക്കളുടെ വീട്ടിലാണ് താമസിച്ചിരുന്നത്. വ്യാഴാഴ്ച ഇവര് വാടക വീട്ടിലേക്ക് താമസം മാറി. തുടര്ന്നാണ് മൂന്നുപേര് വീട് അതിക്രമിച്ച് കയറി ഇരുവരെയും വെട്ടിക്കൊലപ്പെടുത്തിയത്.
നിലവിളി കേട്ട് നാട്ടുകാര് ഓടിക്കൂടിയതോടെ അക്രമികള് രക്ഷപ്പെട്ടു. തൂത്തുക്കുടി ചിപ്കോട്ട് പോലീസ് നടത്തിയ അന്വേഷണത്തിലാണ് കാര്ത്തികയുടെ അച്ഛന് മുത്തുരാമലിംഗയാണ് ഇരുവരെയും കൊലപ്പെടുത്തിയതിന് പിന്നിലെന്ന് വ്യക്തമായത്.
