കൊച്ചി: കളമശേരി സ്ഫോടനത്തില് അറസ്റ്റിലായ ഡൊമിനിക് മാര്ട്ടിന്റെ മറ്റ് ബന്ധങ്ങള് അന്വേഷിക്കാതെ പോലീസ്. ഡൊമിനിക് മാര്ട്ടിന് പറഞ്ഞ കഥയ്ക്ക് അപ്പുറത്തേക്ക് കടക്കാന് പോലീസ് തയാറായിട്ടില്ല. തന്നില് തന്നെ അന്വേഷണം ഒതുങ്ങണമെന്ന് ഒറ്റ ലക്ഷ്യത്തോടെയായിരുന്നു ഇയാളുടെ നീക്കങ്ങള്. ഡൊമിനിക് മാര്ട്ടിന് എന്തായിരുന്നു, എവിടെയായിരുന്നു, വരുമാനത്തിന് അപ്പുറമായിരുന്നോ ജീവിതം, സാമ്പത്തിക നില ഏങ്ങനെയായിരുന്നു തുടങ്ങിയ കാര്യത്തില് പോലീസ് അന്വേഷണം കാര്യമായി നടക്കുന്നില്ല.
സ്വന്തമായി ഫ്ലാറ്റുകള് ഉണ്ടായിരുന്നിട്ടും വാടക വീട്ടില് താമസിക്കാനുള്ള സാഹചര്യം എന്തായിരുന്നു എന്ന കാര്യത്തിലും അന്വേഷണമില്ല. ഇയാളുടെ മനോനില പരിശോധിക്കാന് പോലും തയാറാകാതെ വേഗത്തില് അന്വേഷണം അവസാനിപ്പിക്കാനാണ് പോലീസ് ശ്രമം. ബോംബ് നിര്മിച്ചതും കണ്വന്ഷന് ഹാളില് സ്ഥാപിച്ചതും റിമോര്ട്ട് ഉപയോഗിച്ച് സ്ഫോടനം നടത്തിയതുമെല്ലാം ഡൊമിനിക് മാര്ട്ടിന് ഫോണില് ചിത്രീകരിച്ചിട്ടുണ്ടെന്നാണ് പോലീസ് അറിയിക്കുന്നത്. 15 വര്ഷത്തിലേറേ വിദേശത്ത് താമസിച്ച മാര്ട്ടിന് ബോംബ് നിര്മാണം പഠിച്ചത് അവിടെ വച്ചാണെന്ന് പറയുന്നു. ഇക്കാര്യം ദേശീയ അന്വേഷണ ഏജന്സിയുടെ നിരീക്ഷണത്തിലാണ്. പ്രതിയുടെ ഫോണ് പോലീസ് ഫോറന്സിക് പരിശോധനയ്ക്കയച്ചിട്ടുണ്ട്.
