ന്യൂദല്ഹി: ഭാരതത്തിന്റെ അന്ത്യശാസന കാലാവധി കഴിഞ്ഞതിനാല് 41 നയതന്ത്ര ഉദ്യോഗസ്ഥരെയും കുടുംബാംഗങ്ങളെയും കാനഡ തിരിച്ചുവിളിച്ചു. ഖാലിസ്ഥാനി ഭീകരന് ഹര്ദീപ് സിങ് നിജ്ജാറിന്റെ കൊലപാതകത്തിനു പിന്നില് ഭാരതമാണെന്ന കാനഡ പ്രധാനമന്ത്രി ജസ്റ്റിന് ട്രൂഡോയുടെ പ്രസ്താവനയെത്തുടര്ന്നാണ് കേന്ദ്ര സര്ക്കാര് നിലപാട് കടുപ്പിച്ചത്. ഭാരത നയതന്ത്ര പ്രതിനിധിയെ പുറത്താക്കി ട്രൂഡോ സര്ക്കാര് പ്രശ്നം വഷളാക്കിയപ്പോള് 41 നയതന്ത്രജ്ഞരെയും പിന്വലിക്കാന് ഭാരതം കാനഡയ്ക്ക് അന്ത്യശാസനം നല്കുകയായിരുന്നു.
ദല്ഹിയിലെ 21 കനേഡിയന് നയതന്ത്രജ്ഞര്ക്കും ആശ്രിതര്ക്കും ഒഴികെ മറ്റെല്ലാവര്ക്കും നയതന്ത്ര ഇളവുകള് ഏകപക്ഷീയമായി നീക്കുന്നത് ഭാരതം അറിയിച്ചെന്ന് കാനഡ വിദേശകാര്യ മന്ത്രി മിലന് ജോളി പറഞ്ഞു.
ചണ്ഡീഗഡ്, മുംബൈ, ബെംഗളൂരു കോണ്സുലേറ്റുകളിലെ എല്ലാ സേവനങ്ങളും താത്ക്കാലികമായി നിര്ത്തി, ഭാരതത്തില് ശേഷിക്കുന്ന എല്ലാ നയതന്ത്ര ഉദ്യോഗസ്ഥരെയും ന്യൂദല്ഹിയിലെ ഹൈക്കമ്മിഷന് ആസ്ഥാനത്തേക്ക് നിയോഗിച്ചെന്ന് അവര് വ്യക്തമാക്കി. 21 പേര്ക്കും അവരുടെ കുടുംബാംഗങ്ങള്ക്കും മാത്രമേ നയതന്ത്ര പദവി ഭാരതം അനുവദിക്കൂവെന്നും മറ്റുള്ളവരുടെ സംരക്ഷണം എടുത്തുകളയുമെന്നും ജോളി ഒട്ടാവയില് തുടര്ന്നു.
പരസ്പര നയതന്ത്ര സാന്നിധ്യത്തില് ശക്തിയിലും റാങ്കിലും തുല്യത വേണമെന്നു കാട്ടിയാണ് 41 നയതന്ത്ര ഉദ്യോഗസ്ഥരെ പിന്വലിക്കണമെന്ന് ഭാരതം കഴിഞ്ഞ മാസം കാനഡയോട്
ആവശ്യപ്പെട്ടത്. കനേഡിയന് നയതന്ത്ര ഉദ്യോഗസ്ഥര് കാനഡയിലെ ഭാരതീയ നയതന്ത്ര ഉദ്യോഗസ്ഥരെക്കാള് കൂടുതലാണ്.
ഭാരതത്തിനുള്ളില് ദല്ഹിക്ക് പുറത്ത് പ്രവര്ത്തിച്ചിരുന്ന കനേഡിയന് നയതന്ത്രജ്ഞരില് ഭൂരിഭാം പേരെയും ക്വാലാലംപൂരിലേക്കും സിംഗപ്പൂരിലേക്കും നിയോഗിച്ചതായി മിലന് ജോളി കൂട്ടിച്ചേര്ത്തു.
