പൊന്‍കുന്നം (കോട്ടയം): പി.പി.റോഡില്‍ കൊപ്രാക്കളം ജങ്ഷനില്‍ ഓട്ടോറിക്ഷയും ജീപ്പും കൂട്ടിയിച്ച് ഓട്ടോയാത്രക്കാരായ മൂന്നുപേര്‍ മരിച്ചു. തിടനാട് സ്വദേശിയും അരുവിക്കുഴിയില്‍ താമസക്കാരനുമായ തുണ്ടത്തിന്‍ ആനന്ദ് (24), പള്ളിക്കത്തോട് കൈയ്യൂരി കമ്പിപ്പറമ്പില്‍ അഭിജിത്ത് (26), കുരോപ്പട പാറാമറ്റം കളപ്പുരയ്‌ക്കല്‍ വിഷ്ണു വിജയന്‍ (23) എന്നിവരാണ് മരിച്ചത്.
ഗുരുതരമായി പരിക്കേറ്റ മൂന്നു പേരും സംഭവ സ്ഥലത്ത് തന്നെ മരിച്ചു. ഇവര്‍ക്കൊപ്പം ഓട്ടോയിലുണ്ടായിരുന്ന അരുവിക്കുഴി ഓലിക്കല്‍ വീട്ടില്‍ അഭിജിത്ത് (23) അരീപ്പറമ്പ് കളത്തില്‍വീട്ടില്‍ അഭിജിത്ത് (18) എന്നിവര്‍ കോട്ടയം മെഡിക്കല്‍കോളേജില്‍ ഗുരുതരാവസ്ഥയില്‍ ചികിത്സയിലാണ്. ബുധനാഴ്ച രാത്രി 10.30നായിരുന്നു അപകടം.
ഓട്ടോറിക്ഷയില്‍ എതിരെ വന്ന ജീപ്പ് ദിശ തെറ്റി വന്നു ഇടിക്കുകയായിരുന്നു. ഇളങ്ങുളം സ്വദേശിയുടേതാണ് ജീപ്പ്. അഭിജിത്തിന്റെയും ആനന്ദിന്റെ സംസ്‌കാരം വീട്ടുവളപ്പില്‍ നടത്തി. വിഷ്ണുവിന്റെ സംസ്‌കാരം ഇന്ന് രാവിലെ 10.30ന് പാറാമുട്ടത്തെ വീട്ടുവളപ്പില്‍.
യുവാക്കളുടെ മരണത്തിന് ഇടയാക്കിയ വാഹനാപകടത്തിലെ ജീപ്പ് ഓടിച്ചിരുന്നയാളെ പോലീസ് അറസ്റ്റ് ചെയ്തു. ഇളംകുളം കൂരാലി ചേരീപ്പുറം വീട്ടില്‍ പാട്രിക് ജോസി (38) നെയാണ് പൊന്‍കുന്നം പോലീസ് അറസ്റ്റ് ചെയ്തത്. ജീപ്പ് ഡ്രൈവറായ ഇയാള്‍ മദ്യപിച്ചതായി കണ്ടെത്തിയതിനെ തുടര്‍ന്നാണ് അറസ്റ്റ്. റിപ്പോര്‍ട്ടു കിട്ടിയാലുടന്‍ തന്നെ ഇയാളുടെ ലൈസന്‍സ് സംബന്ധിച്ച് നിയമപരമായ നടപടികള്‍ സ്വീകരിക്കുമെന്ന് മോട്ടോര്‍ വാഹന വകുപ്പ് ഉദ്യോഗസ്ഥര്‍ വ്യക്തമാക്കി.
