പാലക്കാട്: മൈക്രോ ഫിനാന്സ് ജീവനക്കാര് ഭീഷണിപ്പെടുത്തിയതിന് പിന്നാലെ ജീവനൊടുക്കി വീട്ടമ്മ. പാലക്കാട് പൂളക്കാട് കൃഷ്ണന്കുട്ടിയുടെ ഭാര്യ വത്സല ആണ് മരിച്ചത്. മൈക്രോ ഫിനാന്സ് ജീവനക്കാര് ഭീഷണിപ്പെടുത്തിയതാണ് ആത്മഹത്യക്ക് കാരണമെന്ന് കാണിച്ച് വീട്ടുകാര് പോലീസിന് പരാതി നല്കി.
ചായക്കട തൊഴിലാളിയാണ് 58-കാരിയായ വത്സല. കടുത്ത സാമ്പത്തിക പ്രതിസന്ധിയിലൂടെ കടന്ന് പോകുമ്പോള് മൈക്രോ ഫിനാന്സ് സംഘങ്ങളില് നിന്ന് കടം വാങ്ങിയിരുന്നു. ഇതില് പലപ്പോഴും തിരിച്ചടവ് മുടങ്ങി. പിന്നാലെ മൈക്രോ ഫിനാന്സ് സംഘങ്ങള് വീട്ടിലും ചായക്കടയിലും മാറി മാറി എത്തി ഭീഷണിപ്പെടുത്തിയിരുന്നതായി വീട്ടുകാര് പറയുന്നു.
ഇതില് ഏറെ അസ്വസ്ഥയായിരുന്നു വത്സല. പരാതിയില് കേസ് രജിസ്റ്റര് ചെയ്തിട്ടുണ്ടെന്നും അന്വേഷണത്തിനുശേഷം മാത്രമേ കൂടുതല് കാര്യങ്ങള് വ്യക്തമാകൂ എന്നും ചിറ്റൂര് പോലീസ് അറിയിച്ചു.
