കാസര്ഗോഡ്: രോഗിയില്നിന്ന് കൈക്കൂലി വാങ്ങിയ സംഭവത്തിന് പിന്നാലെ ഡോക്ടര്ക്ക് സസ്പെന്ഷന്. കാസര്ഗോഡ് ജനറല് ആശുപത്രിയിലെ അനസ്തേഷ്യാവിഭാഗം സീനിയര് കണ്സള്ട്ടന്റ് ഡോ. വെങ്കിടഗിരിയെ ആണ് ആരോഗ്യവകുപ്പ് സസ്പെന്ഡ് ചെയ്തത്.
2000 രൂപയാണ് ഡോക്ടര് കൈക്കൂലിയായി ആവശ്യപ്പെട്ടത്. കാസര്ഗോഡ് സ്വദേശിയായ രോഗിയുടെ ഹെര്ണിയ ചികിത്സയ്ക്കായി ജനറല് ആശുപത്രിയില് ചികിത്സ തേടിയിരുന്നു. ശസ്ത്രക്രിയയ്ക്ക് നിര്ദേശിച്ച ഡോക്ടര് അനസ്തെറ്റിസ്റ്റ് വെങ്കിടഗിരിയെ കണ്ട് തീയതി വാങ്ങാനും ആവശ്യപ്പെട്ടു. തുടര്ന്ന് പരാതിക്കാരന് വെങ്കിടഗിരിയെ കണ്ടപ്പോള് ഡിസംബറില് ശസ്ത്രക്രിയ ചെയ്യാമെന്ന് അറിയിച്ചു.
വേദന അസഹ്യമായതിനെതുടര്ന്ന് വീണ്ടും മൂന്നുതവണ വെങ്കിടഗിരിയെ കണ്ടു. അപ്പോഴാണ് ശസ്ത്രക്രിയ നേരത്തേചെയ്യാന് 2000 രൂപ വേണമെന്ന് ആവശ്യപ്പെട്ടത്. തുടര്ന്ന് രോഗി വിവരം വിജിലന്സിനെ അറിയിക്കുകയായിരുന്നു. തലശ്ശേരി വിജിലന്സ് കോടതിയില് ഹാജരാക്കിയ ഡോക്ടറെ റിമാന്ഡ് ചെയ്തു.
