തിരുവനന്തപുരം: അതിതീവ്ര മഴയില് സംസ്ഥാനത്ത് വ്യാപക നാശം.പത്തനംതിട്ട, കോട്ടയം, ഇടുക്കി, കോഴിക്കോട് ജില്ലകള് പ്രളയ ഭീതിയിലാണ്.ഉരുള്പൊട്ടലും പെരുമഴയും ഏറ്റവും രൂക്ഷമാണ് ഈ ജില്ലകളില്.
പത്തനംതിട്ട റാന്നിയില് സ്ഥിതി അതീവ ഗുരുതരം. പമ്പ കരകവിഞ്ഞൊഴുകുന്നതിനാല് റാന്നിയിലെ ജനവാസ മേഖലകളും ടൗണും പൂര്ണമായും വെള്ളത്തിലായി.ശക്തമായ മഴ തുടരുന്നത് ആശങ്കയുളവാക്കുന്നു. കോഴിക്കോട് ഈങ്ങാപ്പുഴ ഉള്പ്പെടെയുള്ള മലയോര മേഖലകളിലും മലപ്പുറത്തും ഒറ്റരാത്രി കൊണ്ട് പെയ്ത അതിതീവ്ര മഴയില് വെള്ളപ്പൊക്കവും വ്യാപക നാശനഷ്ടങ്ങളുമുണ്ടായി. മഴക്കെടുതിയിലും വെള്ളപ്പൊക്കത്തിലും സംസ്ഥാനത്ത് ഇതുവരെ എട്ട് പേര് മരിച്ചു.
കോട്ടയം പൂഞ്ഞാര് തെക്കേക്കര പയ്യാനിത്തോട്ടത്തില് ഉരുള്പൊട്ടി വീട് ഇടിഞ്ഞ് ഇരുപത്തിനാലുകാരനായ ജോസഫിന് ജോണിയും അമ്മ റജീനയും മരിച്ചു. ഇടുക്കി അടൂര്മലയില് ഉരുള്പൊട്ടലില് കുടയത്തൂര് സ്വദേശി സുമതിയും കോലാഹലമേട്ടില് വീടിനു മുകളില് മണ്ണുവീണ് വൈക്കം സ്വദേശി പ്രഭാകരന് നായരും മരിച്ചു. മലപ്പുറത്ത് ഒഴുക്കില്പ്പെട്ട് അബ്ദുല് മുഹൈനി (3), ആദം അയ്മന് (4) എന്നീ രണ്ടു കുട്ടികളും മരണപ്പെട്ടു.വയനാട് പടിഞ്ഞാറെത്തറയില് വെള്ളം പമ്പ് ചെയ്യുന്നതിനിടെ വൈദ്യുതാഘാതമേറ്റി ബെന്നി മരിച്ചു.കൊല്ലം നീണ്ടകരയില് വള്ളം മറിഞ്ഞ് കാണാതായ രാധാകൃഷ്ണന്റെ മൃതദേഹം കണ്ടെത്തി.കോട്ടയം വാകത്താനത്ത് വെളളക്കെട്ടില് വീണ് മിലന്(11) മരിച്ചു.
9 ജില്ലകളില് ചുവപ്പ് ജാഗ്രത
സംസ്ഥാനത്തെ ഒമ്പത് ജില്ലകളില് കേന്ദ്ര കാലാവസ്ഥ വകുപ്പ് ചുവപ്പ് ജാഗ്രത
പ്രഖ്യാപിച്ചു.ആറ് അണക്കെട്ടുകളില് ചുവപ്പ് ജാഗ്രത പ്രഖ്യാപിച്ചിട്ടുണ്ട്. പത്തനംതിട്ട മൂഴിയാര്, ഇടുക്കി കല്ലാര്കുട്ടി, ലോവര് പെരിയാര്, തൃശൂര് പെരിങ്ങല്കുത്ത്, തിരുവനന്തപുരം നെയ്യാര്, പാലക്കാട് മംഗലം എന്നീ അണക്കെട്ടുകളിലാണ് ചുവപ്പ് ജാഗ്രത. പമ്പ, മണിമല നദികളില് ജലനിരപ്പ് അപകടകരമായ വിധത്തില് ഉയരുകയാണ്. മുന്കരുതലിന്റെ ഭാഗമായി വിവിധ ജില്ലകളില് വിനോദസഞ്ചാരം പൂര്ണമായും നിരോധിക്കുകയും മലയോര മേഖലകളില് രാത്രി യാത്രയ്ക്ക് നിരോധനമേര്പ്പെടുത്തുകയും ചെയ്തിട്ടുണ്ട്.
