ഏറ്റുമാനൂര്‍: ഏറ്റുമാനൂര്‍ ടൗണില്‍ വ്യാപക മോഷണശ്രമം. എംസി റോഡില്‍ വില്ലേജ് ഓഫീസിന് സമീപമുള്ള ബീനാ ബില്‍ഡിങില്‍ പ്രവര്‍ത്തിക്കുന്ന മാതൃഭൂമി ന്യൂസ് ബ്യൂറോ, ഏറ്റുമാനൂര്‍ പ്രസ് ക്ലബ്ബ് ഓഫീസ്, സ്‌നേഹിതാ ഹോം നഴ്‌സിങ്, പണ്ടാരശ്ശേരില്‍ ബില്‍ഡിങിലുള്ളമരിയാ ഓട്ടോമൊബൈല്‍ തുടങ്ങിയ സ്ഥാപനങ്ങളിലാണ് ബുധനാഴ്ച അര്‍ദ്ധരാത്രിയ്‌ക്ക് ശേഷം മോഷണശ്രമം നടന്നത്.
പൂട്ടുകള്‍ പൊളിച്ച് അകത്ത് കടന്ന് സാധനങ്ങള്‍ വാരിവലിച്ചിട്ട് പരിശോധിച്ച നിലയിലായിരുന്നു. സ്‌നേഹിതാ ഹോം നഴ്‌സിങ് ഓഫീസിന്റ സ്റ്റീല്‍ അലമാര കമ്പി ഉപയോഗിച്ച് കുത്തി പൊളിക്കാന്‍ ശ്രമിച്ചിട്ടുണ്ട്.
ഇവിടത്തെ സിസിടിവി ക്യാമറ തുണി ഉപയോഗിച്ച് മോഷ്ടാക്കള്‍ മറച്ചിരുന്നുവെങ്കിലും മോഷ്ടാവിന്റ മുഖം ഒരു ക്യാമറയില്‍ പതിഞ്ഞിട്ടുണ്ട്. മരിയാ ഓട്ടോമൊബൈല്‍ പ്രവര്‍ത്തിക്കുന്ന കെട്ടിടത്തിന്റ പിന്‍ഭാഗത്തെ ചില്ലു തകര്‍ത്തെങ്കിലും ഇരുമ്പു ബാറുകള്‍ ഉണ്ടായിരുന്നതിനാല്‍ അകത്ത് കടക്കാന്‍ കഴിഞ്ഞില്ല.
മാതൃഭൂമി, പ്രസ് ക്ലബ്ബ് ഓഫീസുകളില്‍ പണം സൂക്ഷിച്ചിട്ടില്ലാതിരുന്നതിനാല്‍ നഷ്ടപ്പെട്ടില്ല. ഏറ്റുമാനൂര്‍ പോലീസും, ക്രൈം സ്‌ക്വാഡും സ്ഥലത്ത് പരിശോധന നടത്തി. കെട്ടിടം ഉടമ നല്കിയ പരാതിയില്‍ അന്വേഷണം ആരംഭിച്ചിട്ടുണ്ട്.
ജന്മഭൂമി ഓണ്‍ലൈന്‍