കോട്ടയം: സംസ്ഥാനത്ത് കായിക മേഖലയുമായി ബന്ധപ്പെട്ട് കൂടുതല് പുതുതലമുറ അക്കാദമിക് കോഴ്സുകള് ആരംഭിക്കുമെന്ന് ഉന്നത വിദ്യാഭ്യാസ മന്ത്രി ആര്. ബിന്ദു.
എംജി സര്വകലാശാലയില് സൂസന് മേബിള് ഇന്ഡോര് സ്റ്റേഡിയം ആന്ഡ് സ്പോര്ട്സ് കോംപ്ലക്സ് പദ്ധതിയുടെ ധാരണാപത്രം ഒപ്പുവയ്ക്കുന്ന ചടങ്ങ് ഉദ്ഘാടനം ചെയ്യുകയായിരുന്നു മന്ത്രി.
സ്പോര്ട്സ് മാനേജ്മെന്റ്, മെഡിസിന്, എന്ജിനീയറിങ് തുടങ്ങിയ വിഷയങ്ങളില് പുതുതലമുറ കോഴ്സുകള് ആവിഷ്കരിക്കുന്നത് കായിക മേഖലയുടെ വികസനത്തിനും കൂടുതല് തൊഴിലവസരങ്ങള് സൃഷ്ടിക്കുന്നതിനും ഉപകരിക്കും. നാലു വര്ഷ ബിരുദ കോഴ്സുകളില് കായിക പ്രതിഭകള്ക്ക് മികവിന് ആനുപാതികമായി ക്രെഡിറ്റ് നല്കും.
മന്ത്രി വി.എന്. വാസവന് അധ്യക്ഷനായി. കായിക മന്ത്രി വി. അബ്ദുറഹ്മാന് ധാരണാപത്രം ഏറ്റുവാങ്ങി. സര്വകലാശാലാ രജിസ്ട്രാര് ഡോ. ബി. പ്രകാശ്കുമാറും സംസ്ഥാന സ്പോര്ടസ് യുവജനകാര്യ ഡയറക്ടര് രാജീവ്കുമാര് ചൗധരിയുമാണ് ധാരണാപത്രത്തില് ഒപ്പുവച്ചത്.
