പയ്യോളി: അടിമുടി അഴിമതിയില്‍ മുങ്ങിയ ഹജ്ജ് കമ്മിറ്റിയെ ശുദ്ധീകരിച്ചതും ഹജ്ജ് ക്വാട്ട ഉയര്‍ത്തിയതും നരേന്ദ്രമോദി സര്‍ക്കാരിന്റെ ശക്തമായ ഇടപെടലിന്റെ ഭാഗമാണെന്ന് ദേശീയ ഹജ്ജ് കമ്മിറ്റി ചെയര്‍മാനും ബിജെപി ദേശീയ ഉപാധ്യക്ഷനുമായ എ.പി.
അബ്ദുള്ള കുട്ടി.
മഹത്തായ ആത്മീയ മൂല്യത്തിന്റെ ഉറവിടമാണ് ഭാരതീയ സംസ്‌കാരം. എല്ലാത്തരം വിശ്വാസങ്ങളേയും ഉള്‍ക്കൊള്ളാന്‍ ഭാരതീയ സംസ്‌കാരത്തിന് കഴിയും. അതാണ് ഈ സംസ്‌കാരത്തിന്റെ സവിശേഷതയുമെന്നും അദ്ദേഹം പറഞ്ഞു. പയ്യോളി ആവിക്കല്‍ റോഡിലെ മജ്‌ലിസുരിഫയ്യ സംഘടിപ്പിച്ച ഉറൂസ് മുബാറക്കും മിലാദ് ശരീഫും ഉദ്ഘാടനം ചെയ്യുകയായിരുന്നു അദ്ദേഹം.
നഗരസഭാധ്യക്ഷന്‍ വി.കെ. അബ്ദുറഹ്മാന്‍ അധ്യക്ഷനായി. കൂനഞ്ചേരി അബ്ദുല്ല മുസ്ലിയാര്‍, സയ്യിദ് ഹിളര്‍ തങ്ങള്‍ താനൂര്‍, ന്യൂനപക്ഷ മോര്‍ച്ച ഐടി കണ്‍വീനര്‍ അഡ്വ. ബഷീര്‍ നടുവണ്ണൂര്‍, ന്യൂനപക്ഷ മോര്‍ച്ച സംസ്ഥാന ഉപാധ്യക്ഷന്‍ അഡ്വ. മുഹമ്മദ് റിശാല്‍, ബിജെപി പയ്യോളി മണ്ഡലം പ്രസിഡന്റ് എ.കെ. ബൈജു, അന്‍വര്‍ പായരുകണ്ടി, അബ്ദുറഹിമാന്‍ പയ്യോളി, ടി. ഖാലിദ് ബിജെപി ന്യൂനപക്ഷ മോര്‍ച്ച ജില്ലാ അധ്യക്ഷന്‍ ഷെയ്‌ക് ഷാഹിദ്, ഫൈസല്‍ കൊയിലാണ്ടി സംസാരിച്ചു.
