തിരുവനന്തപുരം: സഹകരണ സംഘത്തില്‍ പണം നിക്ഷേപിച്ചവര്‍ മുന്‍ മന്ത്രിയും കോണ്‍ഗ്രസ് നേതാവുമായ വി എസ് ശിവകുമാറിന്റെ വീടിന് മുന്നില്‍ പ്രതിഷേധിച്ചു. തിരുവനന്തപുരം ജില്ലാ അണ്‍ എംപ്ലോയിസ് സോഷ്യല്‍ വെല്‍ഫെയര്‍ കോ ഓപ്പറേറ്റീവ് സൊസൈറ്റിയില്‍ പണം നിക്ഷേപിച്ചവരാണ് പ്രതിഷേധവുമായി എത്തിയത്. കിള്ളിപ്പാലം, വെള്ളായണി, വലിയതുറ ബ്രാഞ്ചുകളിലെ നിക്ഷേപകരാണ് മുന്‍മന്ത്രിയുടെ വീടിന് മുന്നില്‍ പ്രതിഷേധവുമായി എത്തിയത്.
രണ്ടു വര്‍ഷത്തിലേറെയായി നിക്ഷേപകര്‍ക്ക് പലിശ ലഭിക്കുന്നില്ല. പണം മടക്കി ആവശ്യപ്പെട്ടതോടെ സൊസൈറ്റിയുടെ പ്രധാന ശാഖ പൂട്ടി. സൊസൈറ്റി പ്രസിഡന്റ് രാജേന്ദ്രന്‍ ശിവകുമാറിന്റെ ബിനാമിയാണെന്ന് നിക്ഷേപകര്‍ ആരോപിച്ചു. 300 നിക്ഷേപകരുടെ 13 കോടി നഷ്ടമായി എന്നാണ് പരാതി.
ശിവകുമാറായിരുന്നു 2002ല്‍ സൊസൈറ്റി ഉദ്ഘാടനം ചെയ്തത്. ഈ സഹകരണ സംഘത്തില്‍ നിക്ഷേപിക്കണമെന്ന് ശിവകുമാര്‍ പലരോടും ആവശ്യപ്പെട്ടിരുന്നതായും നിക്ഷേപകര്‍ പറഞ്ഞു.
എന്നാല്‍ തനിക്ക് സൊസൈറ്റിയുമായി ബന്ധമില്ലെന്നാണ് ശിവകുമാറിന്റെ വാദം.പൊലീസ് എത്തിയാണ് പ്രതിഷേധക്കാരെ ശിവകുമാറിന്റെ വീട്ടുവളപ്പില്‍ നിന്നും നീക്കം ചെയ്തത്. പിന്നീട് ഗേറ്റിന് മുന്നിലും നിക്ഷേപകര്‍ പ്രതിഷേധിച്ചു.
