ഹാങ്ചൊ: ചെസ്സില് ഭാരത താരം അര്ജുന് കുമാര് എരിഗെയ്സി എട്ടാം റൗണ്ടിലേക്ക് മുന്നേറി. ഇന്ന് ഉച്ചയ്ക്ക് 12.30ന് എട്ടാം റൗണ്ട് മത്സരത്തില് നിന്നു മുന്നേറിയാല് ഉച്ചതിരിഞ്ഞ് നടക്കുന്ന മെഡല് പോരാട്ടത്തില് മത്സരിക്കാനാകും. ഏഴാം റൗണ്ട് മത്സരത്തില് ഇന്തോനേഷ്യന് താരം പ്രയസ്മോറോ നൊവേന്ദ്രയെ തോല്പ്പിച്ചാണ് അര്ജുന്റെ മുന്നേറ്റം.
ഭാരതത്തിന് വേണ്ടി ഇന്നലെ വ്യക്തിഗത ഇനത്തില് മത്സരിച്ച മറ്റൊരു ഗ്രാന്ഡ് മാസ്റ്റര് വിദിത് സന്തോഷ് ഗുജറാത്തി ഏഴാം റൗണ്ടില് പരാജയപ്പെട്ടു. ടോപ് സീഡ് താരമായ ചൈനയുടെ വെയ് യി ആണ് താരത്തെ പരാജയപ്പെടുത്തിയത്.
വനിതാ വ്യക്തിഗത ഇനത്തില് രണ്ട് താരങ്ങള് ഇന്നലെ ഏഴാം റൗണ്ടില് പുറത്തായി. രണ്ട് തവണ ഏഷ്യന് ഗെയിംസ് മെഡല് നേടിയിട്ടുള്ള കൊനേരു ഹംപി ഏഴാം റൗണ്ട് മത്സരത്തില് സമനില പിണഞ്ഞതിനെ തുടര്ന്ന് പുറത്താകുകയായിരുന്നു. ഇന്തോനേഷ്യയുടെ മെദിന ഓലിയക്കെതിരെയായിരുന്നു കൊനേരു മത്സരിച്ചത്. കസാഖ്സ്ഥാന് താരം ഷന്സായാ അബ്ദുമാലിക്കിനെതിരെ മത്സരിച്ചാണ് മറ്റൊരു വനിതാ ഗ്രാന്ഡ് മാസ്റ്റര് ഹരിക ദ്രോണവല്ലി ഏഴാം റൗണ്ടില് സമനില പിടിച്ചത്.
