കോട്ടയം: താന്‍ മരിച്ചിട്ടില്ലെന്ന വിശദീകരണവുമായി മുന്‍ എം എല്‍ എ പി സി ജോര്‍ജ്. ചലച്ചിത്ര സംവിധായകന്‍ കെ ജി ജോര്‍ജിന്റെ മരണത്തെ തുടര്‍ന്ന് പ്രതികരണമാരാഞ്ഞ മാധ്യമപ്രവര്‍ത്തകരോട് ,ആളെ പെട്ടെന്ന് മനസിലാകാതെ കെപിസിസി അധ്യക്ഷന്‍ കെ സുധാകരന്‍ പറഞ്ഞത് ജോര്‍ജ് നല്ല പൊതുപ്രവര്‍ത്തകനാണെന്നാണ്. സുധാകരന്റെ പ്രതികരണത്തില്‍ നിന്ന് മരണപ്പെട്ടത് പി സി ജോര്‍ജാണെന്ന് കരുതിയ ചിലര്‍ തെറ്റായ വാര്‍ത്ത പ്രചരിപ്പിക്കുക കൂടി ചെയ്തതോടെ തെറ്റിദ്ധാരണ ഒഴിവാക്കാന്‍ വിശദീകരണവുമായി രംഗത്തെത്തിയതാണ് പി സി ജോര്‍ജ്.
സുധാകരന്‍ അടുത്ത സുഹൃത്താണെന്ന് പി സി ജോര്‍ജ് പറഞ്ഞു. അദ്ദേഹത്തെ തെറ്റിദ്ധരിപ്പിച്ചതാണ്. സുധാകരന്‍ നല്ല മനുഷ്യനാണെന്നും മാന്യനായ നേതാവിനെ തെറ്റിദ്ധരിപ്പിക്കുന്നത് ശരിയല്ലെന്നും പി സി ജോര്‍ജ് പറഞ്ഞു. പള്ളിയില്‍ നില്‍ക്കുമ്പോഴാണ് ഇക്കാര്യം അറിഞ്ഞതെന്നും ഇതേ തുടര്‍ന്ന് നിരവധിയാളുകള്‍ തന്നെ സമീപിച്ചെന്നും പി സി ജോര്‍ജ് പറഞ്ഞു.
പ്രതികരണത്തില്‍ പിഴവ് മനസിലായതോടെ ഖേദം പ്രകടിപ്പിച്ച് കെ സുധാകരനും രംഗത്തു വന്നു. ആരാണ് മരിച്ചതെന്ന് അപ്പോള്‍ മനസിലായിരുന്നില്ലെന്നും മാധ്യമപ്രവര്‍ത്തകര്‍ അത് വ്യക്തമാക്കിയിരുന്നില്ലെന്നും ഈ സംഭവത്തില്‍ ഖേദിക്കുന്നതായും സുധാകരന്‍ സാമൂഹ്യമാധ്യത്തില്‍ കുറിച്ചു.
