ചവറ: പന്മന ആശ്രമത്തില്‍ മഹാഗുരു ശ്രീ വിദ്യാധിരാജ ചട്ടമ്പിസ്വാമി തിരുവടികളുടെ 170-ാമത് തിരുജയന്തി ആഘോഷം നടന്നു. ആഘോഷങ്ങളുടെ ഉദ്ഘാടനം ജസ്റ്റിസ് എം.ആര്‍. ഹരിഹരന്‍ നായര്‍ നിര്‍വ്വഹിച്ചു. സര്‍വ്വ ഭൂജാലത്തിന്റെയും അഭിവൃദ്ധിക്കായി മാത്രം പ്രയത്‌നിച്ച യോഗിവര്യനായിരുന്നു ചട്ടമ്പിസ്വാമികളെന്ന് അദ്ദേഹം പറഞ്ഞു. ചടങ്ങില്‍ ഡോ. സുജിത്ത് വിജയന്‍ പിള്ള എംഎല്‍എ അധ്യക്ഷനായിരുന്നു.
ചട്ടമ്പിസ്വാമികളുടെ ആശയങ്ങള്‍ പുറംലോകത്ത് എത്തിക്കേണ്ടത് കാലഘട്ടത്തിന്റെ ആവശ്യമാണെന്ന് അദ്ദേഹം അധ്യക്ഷ പ്രസംഗത്തില്‍ പറഞ്ഞു. ഗ്രാമ സൗഹൃദ ശാലയുടെ ഉദ്ഘാടനം കെ. ജയകുമാര്‍ ഐഎഎസ് നിര്‍വഹിച്ചു. എയര്‍ വൈസ് മാര്‍ഷല്‍ പി.കെ. ശ്രീകുമാര്‍, പ്രജ്ഞാനന്ദതീര്‍ത്ഥ പാദര്‍, സ്വാമിമാരായ നിത്യ സ്വരൂപാനന്ദ, കൃഷ്ണ മയാനന്ദ തീര്‍ത്ഥപാദര്‍ എന്നിവര്‍ സംസാരിച്ചു. ഗുരുവര്‍ഷം വര്‍ക്കിങ് ചെയര്‍മാന്‍ കോലത്ത് വേണുഗോപാല്‍ സ്വാഗതവും പ്രോഗ്രാം കമ്മിറ്റി കണ്‍വീനര്‍ കലാമണ്ഡലം പ്രശാന്ത് നന്ദിയും പറഞ്ഞു.
