മുംബായ്: അഡ്വാന്‍സ് ബുക്കിംഗ് ആരംഭിച്ച് ആദ്യദിവസം തന്നെ ‘രാമായണ്‍’ 1.53 കോടി രൂപയുടെ ടിക്കറ്റുകള്‍ വിറ്റു. മുംബായിലാണ് കൂടുതല്‍ ബുക്കിംഗ്.
മുന്‍കൂര്‍ ബുക്കിംഗുകളില്‍ ഭൂരിഭാഗവും ഹിന്ദിയിലാണ്, 1,351 ഷോകളിലായി 1.39 കോടി രൂപ ലഭിച്ചു. ചിത്രത്തിന്റെ ആദ്യ ഭാഗം നവംബര്‍ അഞ്ചിന് ഇന്ത്യയിലും ആറിന് ലോകമെമ്പാടും റിലീസ് ചെയ്യും. രണ്ടാം ഭാഗം 2027 ദീപാവലിക്ക് റിലീസ് ചെയ്യാനാണ് ആലോചിക്കുന്നത്. ചിത്രത്തിന്റെ ത്രിഡി ഫോര്‍മാറ്റിനും നല്ല പ്രതികരണമാണ് ലഭിക്കുന്നത്.
രണ്ട് ഭാഗങ്ങളുള്ള ഒരു സിനിമാറ്റിക് പ്രോജക്റ്റാണ് ‘രാമായണ്‍’. നമിത് മല്‍ഹോത്രയുടെ പ്രൈം ഫോക്കസ് സ്റ്റുഡിയോസും ഡിഎന്‍ഇജിയും യാഷിന്റെ മോണ്‍സ്റ്റര്‍ മൈന്‍ഡ് ക്രിയേഷന്‍സും സഹകരിച്ചാണ് ചിത്രം നിര്‍മ്മിക്കുന്നത്.
രണ്‍ബീര്‍ കപൂര്‍ ശ്രീരാമനായും സായി പല്ലവി സീതയായും യാഷ് രാവണനായും സണ്ണി ഡിയോള്‍ ഹനുമാനായും അഭിനയിക്കുന്നു.
ഹൈദരാബാദില്‍ നടന്ന പ്രത്യേക പ്രീ-റിലീസ് പരിപാടിയില്‍ ചിത്രം വലിയൊരു ദൃശ്യാനുഭവമായിരിക്കുമെന്നാണ് അണിയറപ്രവര്‍ത്തകര്‍ അവകാശപ്പെട്ടത്. രണ്‍ബീര്‍ കപൂര്‍, യാഷ്, സായ് പല്ലവി, സംവിധായകന്‍ നിതേഷ് തിവാരി, നിര്‍മ്മാതാവ് നമിത് മല്‍ഹോത്ര, വിതരണക്കാരനായ ദില്‍ രാജു എന്നിവര്‍ അനുഭവങ്ങള്‍ പങ്കുവെക്കാന്‍ ഒത്തുചേര്‍ന്നു.
ആദ്യദിനം 1.53 കോടിയുടെ അഡ്വാന്‍സ് ബുക്കിംഗ്, ‘രാമായണ്‍’ അസാധാരണ ദൃശ്യാനുഭവമെന്ന് അണിയറപ്രവര്‍ത്തകര്‍
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
