കോട്ടയം: പുതുപ്പള്ളി ഉപതെരഞ്ഞെടുപ്പിന്റെ ആദ്യ മണിക്കൂറുകളില് മികച്ച പോളിങ്. വോട്ടിംഗ് ആരംഭിച്ച് നാല് മണിക്കൂര് പിന്നിടുമ്പോള് 30.1 ശതമാനം പോളിങ് രേഖപ്പെടുത്തി. അരലക്ഷത്തിലധികം പേരാണ് ഇതുവരെ വോട്ട് രേഖപ്പെടുത്തിയത്. മണര്കാട്, പാമ്പാടി പഞ്ചാത്തുകളിലാണ് ഏറ്റവും കൂടുതല് പോളിങുള്ളത്. ഇവിടെ പോളിംഗ് 30 ശതമാനം കടന്നു.
അയര്ക്കുന്നം, അകലക്കുന്നം പഞ്ചായത്തുകളിലാണ് ഏറ്റവും കുറവ് പോളിങ് രേഖപ്പെടുത്തിയത്. മിക്ക പോളിംഗ് ബൂത്തുകളിലും രാവിലെ മുതല് വോട്ടര്മാരുടെ നീണ്ടനിരയാണ് കാണപ്പെടുന്നത്. പോളിങ് യന്ത്രം തകരാറിലായതോടെ ചിലയിടങ്ങളില് വോട്ടിംഗ് തടസപ്പെട്ടു. പാമ്പാടി പഞ്ചായത്തിലെ 95ാം നമ്പര് ബൂത്തിലും വാകത്താനത്തെ 163ാം നമ്പര് ബൂത്തിലുമാണ് തകരാര് നേരിട്ടത്. ഉടനെ പ്രശ്നം പരിഹരിച്ചു. എന്നാല് പത്താം നമ്പര് ബൂത്തായ അയര്ക്കുന്നം സര്ക്കാര് എല്പി സ്കൂളില് അര മണിക്കൂറോളം താമസിച്ചാണ് വോട്ടെടുപ്പ് തുടങ്ങാനായത്.
എൽഡിഎഫ് സ്ഥാനാർത്ഥി ജെയ്ക് സി.തോമസ് മണർകാട് ഗവ.എൽപി സ്കൂളിലെ 72-ാം നമ്പർ ബൂത്തിലെത്തി വോട്ടു രേഖപ്പെടുത്തി. യുഡിഎഫ് സ്ഥാനാർത്ഥി ചാണ്ടി ഉമ്മൻ പുതുപ്പള്ളി ജോർജിയൻ പബ്ലിക് സ്കൂളിലെ 126ാം നമ്പർ ബൂത്തിൽ വോട്ട് ചെയ്തു. അമ്മ മറിയാമ്മ ഉമ്മനും സഹോദരിമാർക്കുമൊപ്പം എത്തിയാണ് ചാണ്ടി ഉമ്മൻ വോട്ട് രേഖപ്പെടുത്തിയത്. ബിജെപി സ്ഥാനാർത്ഥി ലിജിൻ ലാൽ കടുത്തുരുത്തി മണ്ഡലത്തിലെ കുറിച്ചിത്താനം സ്വദേശിയായതിനാൽ പുതുപ്പള്ളിയിൽ വോട്ട് ഇല്ല.
വൈകിട്ട് ആറ് മണി വരെയാണ് വോട്ടെടുപ്പ് നടക്കുക. 90,281 സ്ത്രീകളും 86,132 പുരുഷന്മാരും 4 ട്രാൻസ്ജെൻഡറുകളും അടക്കം മണ്ഡലത്തിൽ 1,76,417 വോട്ടർമാരാണുള്ളത്. പോളിംഗ് ഡ്യൂട്ടിക്കായി 872 ഉദ്യോഗസ്ഥരെയാണ് നിയോഗിച്ചിരിക്കുന്നത്.
