ന്യൂദല്ഹി: പ്രധാനമന്ത്രി നരേന്ദ്രമോദി ദ്വിദിന സന്ദര്ശനത്തിനായി ഇന്തോനേഷ്യയിലേക്ക്. പ്രസിഡന്റ് ജോക്കോ വിദോദോയുടെ ക്ഷണപ്രകാരമാണ് പ്രധാനമന്ത്രി ആറ്, ഏഴ് തിയ്യതികളില് ഇന്തോനേഷ്യയുടെ തലസ്ഥാനമായ ജക്കാര്ത്ത സന്ദര്ശിക്കുന്നത്. സന്ദര്ശനവേളയില് ഇന്തോനേഷ്യ ആതിഥേയത്വം വഹിക്കുന്ന 20-ാം ആസിയാന്-ഇന്ത്യ ഉച്ചകോടിയിലും 18-ാം കിഴക്കന് ഏഷ്യ ഉച്ചകോടിയിലും പ്രധാനമന്ത്രി പങ്കെടുക്കും.
2022ല് ഇന്ത്യ-ആസിയാന് ബന്ധം സമഗ്രമായ തന്ത്രപര പങ്കാളിത്തത്തിലേക്ക് ഉയര്ത്തിയതിനുശേഷമുള്ള ആദ്യ ഉച്ചകോടിയാണു വരാനിരിക്കുന്ന ആസിയാന്-ഇന്ത്യ ഉച്ചകോടി. ഉച്ചകോടി ഇന്ത്യ-ആസിയാന് ബന്ധങ്ങളുടെ പുരോഗതി അവലോകനം ചെയ്യുകയും സഹകരണത്തിന്റെ ഭാവിദിശ നിശ്ചയിക്കുകയും ചെയ്യും.
ആസിയാന് രാജ്യങ്ങളിലെ നേതാക്കള്ക്കും ഇന്ത്യ ഉള്പ്പെടെയുള്ള എട്ടു ചര്ച്ചാ പങ്കാളികള്ക്കും പ്രാദേശികവും ആഗോളവുമായ സുപ്രധാന വിഷയങ്ങളില് കാഴ്ചപ്പാടുകള് പങ്കിടാന് കിഴക്കന് ഏഷ്യ ഉച്ചകോടി അവസരമൊരുക്കും.
