പുതുപ്പള്ളി: പുതുപ്പള്ളിയിൽ ബിജെപി സ്ഥാനാർത്ഥി ലിജിൻ ലാലിന്റെ തെരഞ്ഞെടുപ്പ് പ്രചാരണാർത്ഥം മണ്ഡലത്തിലെത്തിയ കേന്ദ്ര മന്ത്രി രാജീവ് ചന്ദ്രശേഖർ എൻ എസ് എസ് പ്രവർത്തകർക്ക് ഗണേശ വിഗ്രഹം സമ്മാനിച്ചു. മണ്ഡലത്തിൽ പ്രചാരണം നടത്തുന്ന എൻ എസ് എസ് ഭാരവാഹികൾക്കൊപ്പം ഉച്ചഭക്ഷണവും കഴിഞ്ഞാണ് മന്ത്രി മടങ്ങിയത്.
ഗണപതി എന്നത് ഒരു മിത്ത് ആണെന്ന കേരള നിയമസഭ സ്പീക്കറുടെ പരാമർശം അടുത്ത കാലത്ത് ഏറെ പ്രതിഷേധമുയർത്തിയിരുന്നു. ഭക്തജനങ്ങളുടെ വികാരം വൃണപ്പെടുത്തിയ പരാമർശത്തിന്റെ പേരിൽ സ്പീക്കർ മാപ്പ് പറയണമെന്നാവശ്യപ്പെട്ടുകൊണ്ട് എൻഎസ്എസ് സംസ്ഥാന വ്യാപകമായി നടത്തിയ നാമജപ ഘോഷയാത്രയിൽ സ്ത്രീകളടക്കം വൻ ഭക്തജന പങ്കാളിത്തമുണ്ടായി. എന്നാൽ നാമജപ ഘോഷയാത്ര നടത്തിയതിനെതിരേ എൻഎസ്എസ് വൈസ് പ്രസിഡൻ്റ് സംഗീത് കുമാർ അടക്കമുള്ള നേതാക്കൾക്കെതിരേ കേസെടുക്കുന്നതിനാണ് കേരളത്തിലെ ഇടത് സർക്കാർ മുതിർന്നത്. പ്രസ്തുത നടപടിക്കെതിരേയും വ്യാപകമായ പ്രതിഷേധമാണ് ഉയർന്നത്.
പ്രസ്തുത പശ്ചാത്തലത്തിൽ എൻ എസ് എസ് പ്രവർത്തകർക്ക് ഗണേശ വിഗ്രഹം സമ്മാനിച്ച രാജീവ് ചന്ദ്രശേഖറിന്റെ നടപടി ഏറെ പ്രതീകാത്മകമാണ്. ശബരിമല മുതൽ പത്മനാഭസ്വാമി ക്ഷേത്രം വരെ എല്ലാ വിഷയങ്ങളിലും ഭക്തജനങ്ങളുടെ വികാരങ്ങൾക്കും ആചാരങ്ങൾക്കുമാണ് മുൻഗണന നൽകേണ്ടതെന്ന നിലപാടാണ്‌ 26 തവണ മല ചവിട്ടിയിട്ടുള്ള രാജീവ് ചന്ദ്രശേഖർ എക്കാലവും സ്വീകരിച്ചു പോന്നത്.
