തിരുവനന്തപുരം: അഴിമതിക്കായി ചെക്പോസ്റ്റ് തുറന്നിട്ട് സര്ക്കാര്. അഴിമതി തടയുമെന്ന പിണറായി സര്ക്കാരിന്റെ ഉറപ്പും പരാജയം. അതിര്ത്തി ചെക് പോസ്റ്റുകളില് വിജിലന്സിന്റെ സംസ്ഥാനതല മിന്നല് പരിശോധനയില് വ്യാപക ക്രമക്കേടുകള് കണ്ടെത്തി. എക്സൈസ് വകുപ്പിന്റെ 39 ചെക് പോസ്റ്റുുകളിലും, മോട്ടോര് വാഹന വകുപ്പിന്റെ 19 ചെക് പോസ്റ്റുകളിലും, മൃഗസംരക്ഷണ വകുപ്പിന്റെ കീഴിലുള്ള 12 കന്നുകാലി ചെക്പോസ്റ്റുകളിലും നടത്തിയ പരിശോധനയിലാണ് ക്രമക്കേടുകള് കണ്ടെത്തിയത്.
അഴിമതി തടയാന് എംവിഡി ചെക്പോസ്റ്റുകളില് സ്ഥാപിച്ച ക്യാമറകള്പോലും പ്രവര്ത്തിക്കുന്നില്ല. ഓണക്കാലത്ത് പോലും ഉദ്യോഗസ്ഥരെ നിരീക്ഷിക്കാന് മതിയായ സൗകര്യം ഒരുക്കിയിരുന്നില്ലെന്ന് വിജിലന്സ് പരിശോധനയില് കണ്ടെത്തിയ ക്രമക്കേടുകള് വ്യക്തമാക്കുന്നു. കാസര്കോട് ജില്ലയിലെ മഞ്ചേശ്വരം ചെക് പോസ്റ്റില് ഡ്യൂട്ടിയില് കാണേണ്ട മോട്ടോര് വാഹന വകുപ്പ് ഇന്സ്പെക്ടര് ഹാജരില്ലാത്തതും വിജിലന്സ് കണ്ടെത്തി. തിരുവനന്തപുരം ജില്ലയിലെ പൂവാര് മോട്ടോര് വാഹന വകുപ്പ് ചെക്് പോസ്റ്റില് ഓഫീസ് അടച്ചിട്ട് ഉദ്യോഗസ്ഥര് ഉറങ്ങുകയായിരുന്നു.
തിരുവനന്തപുരം പാറശ്ശാല എംവിഡി ചെക്പോസ്റ്റിന് സമീപം ഏജന്റിന്റെ കൈയില് നിന്നും 11,900 രൂപ പിടികൂടി. കൊല്ലം ആര്യങ്കാവിലെ എംവിഡി ചെക്പോസ്റ്റിലെ ഓഫീസ് അസിസ്റ്റന്റിന്റെ മേശപ്പുറത്തു നിന്നും 6,000 രൂപയും, പാലക്കാട് ഗോപാലപുരം എംവിഡി ചെക്ക് പോസ്റ്റില് നിന്നും 3,950 രൂപയും കണ്ടെത്തി. പാലക്കാട് വേലന്താവളം ചെക് പോസ്റ്റില് ഓഫീസിനകത്തെ ഫ്ലക്സ് ബോര്ഡിനടിയില് നിന്നും 4,700രൂപയും, മേശപ്പുറത്തു നിന്നും 1,600 രൂപയും കണക്കില്പ്പെടാത്ത നിലയില് വിജിലന്സ് പിടികൂടി. വാളയാര് ചെക് പോസ്റ്റില് നിന്നും പരിശോധന കഴിഞ്ഞു കടന്നു വന്ന മൂന്നു വാഹനങ്ങള് വിജിലന്സ് പിടികൂടി അമിത ഭാരം കയറ്റിയതിനു 85,500 രൂപ പിഴ ഈടാക്കി. ചെറുവത്തൂര്, വാളയാര് ഔട്ട് എന്നിവിടങ്ങളിലും പരിശോധന കൂടാതെ വാഹനങ്ങളെ കടത്തി വിടുന്നതായും കണ്ടെത്തി.
തിരുവനന്തപുരത്തെ ഏഴ് എക്സൈസ് ചെക്പോസ്റ്റുകളിലും വയനാട് തോല്പെട്ടിയിലും പരിശോധനയില്ലെന്ന് കണ്ടെത്തി. നെയ്യാര് ഡാം ചെക്ക് പോസ്റ്റ് അടച്ചിട്ട് ഉദ്യോഗസ്ഥന് ഉറങ്ങി. നെയ്യാറ്റിന്കര അറക്കുന്ന് കടവ്, പിരായുംമൂട്, പെരുംപഴുതൂര് എന്നിവിടങ്ങളിലും ഉദ്യോഗസ്ഥര് ഉറങ്ങുന്നതായി കണ്ടെത്തി. തിരുവനന്തപുരം നെയ്യാര്ഡാം, പിരായുംമൂട്, മണ്ഡപത്തിന്കടവ്, കൊല്ലം അച്ചന്കോവില്, മലപ്പുറം വഴിക്കടവ് എന്നിവിടങ്ങളില് ഡ്യൂട്ടിസമയം ഉദ്യോഗസ്ഥരില്ലായിരുന്നു. തിരുവനന്തപുരം പിരായുംമൂട്ടില് ഒരു ഉദ്യോഗസ്ഥന് ഗൂഗിള് പേ വഴി 29,250 രൂപ കഴിഞ്ഞ ഏതാനും ആഴ്ചകള്ക്കുള്ളില് ലഭിച്ചതിനെക്കുറിച്ചുള്ള ചോദ്യത്തിന് തൃപ്തികരമായ മറുപടി നല്കാന് കഴിഞ്ഞിട്ടില്ല.
മൃഗസംരക്ഷണ വകുപ്പിന്റെ ചെക്പോസ്റ്റുകളായ ഇടുക്കിയിലെ കുമിളി, ബോഡിമേട്ട്, തിരുവനന്തപുരത്തെ പാറശ്ശാല എന്നിവിടങ്ങളില് പരിശോധന കൂടാതെ വാഹനങ്ങള് കടത്തിവിടുന്നതായി കണ്ടെത്തി. പാറശ്ശാലയില് പരിശോധനയില്ലാതെ കോഴികളുമായി കടന്നുപോയ വാഹനം തിരിച്ച് ചെക്ക്പോസ്റ്റിലെത്തിച്ച് ഫീസ് അടപ്പിച്ചു. കുമിളി, ബോഡിമേട്ട്, ചെക്ക്പോസ്റ്റുകളില് ടിആര് രസീത് നല്കാതെ തുക ഈടാക്കി. കമ്പംമേട്ട് 2,600 രൂപയും, ബോഡിമേട് 1,100 രൂപയും, കണ്ണൂര് ഇരിട്ടിയില് 6,460 രൂപയും വിജിലന്സ് പിടിച്ചെടുത്തു. പാറശ്ശാല കന്നുകാലി ചെക്ക്പോസ്റ്റിലെ കോഴി പരിശോധന രജിസ്റ്റര് പ്രകാരം ഈമാസം 17 ന് ശേഷവും, കന്നുകാലി പരിശോധന രജിസ്റ്റര് പ്രകാരം 24 ന് ശേഷവും യാതൊരു പരിശോധനയും നടത്തിയിട്ടില്ല. ക്രമക്കേടുകളെ പറ്റിയുള്ള വിശദമായ റിപ്പോര്ട്ട് തുടര് നടപടികള്ക്കായി സര്ക്കാരിന് നല്കുമെന്ന് വിജിലന്സ് ഡയറക്ടര് ടി. കെ. വിനോദ് കുമാര് അറിയിച്ചു.
