അക്ഷയ് കുമാര്‍ ഇന്ത്യന്‍ പൗരത്വം സ്വീകരിച്ചു. ഔദ്യോഗിക സര്‍ക്കാര്‍ രേഖകളുടെ ചിത്രം സഹിതം അദ്ദേഹം ട്വിറ്ററില്‍ ഇതിന്റെ തെളിവ് പുറത്തുവിട്ടു. നേരത്തേ അക്ഷയ് കനേഡിയന്‍ പൗരനായിരുന്നു. അതിന്റെ പേരില്‍ ചില വിഭാഗങ്ങളില്‍ നിന്ന് താരം പലപ്പോഴും വിമര്‍ശനം നേരിട്ടിട്ടുണ്ട്.
തന്റെ പേര് അക്ഷയ് ഹരിയോം ഭാട്ടിയ എന്ന് രേഖപ്പെടുത്തിയ രേഖ പങ്കുവെച്ച് അക്ഷയ് ട്വിറ്ററില്‍ കുറിച്ചു. ‘മനസും പൗരത്വവും, രണ്ടും ഹിന്ദുസ്ഥാനി’ . സ്വാതന്ത്ര്യദിനാശംസകള്‍! ജയ് ഹിന്ദ്. ധാരാളം ആരാധകര്‍ താരത്തെ അഭിനന്ദിക്കുകയും തിരിച്ചും സ്വാതന്ത്ര്യദിനാശംസകള്‍ നേരുകയും ചെയ്തു.
ഇന്ത്യന്‍ പൗരത്വത്തിന് അപേക്ഷിക്കുമെന്ന് ഏതാനും വര്‍ഷം മുമ്പ് തന്നെ അക്ഷയ് കുമാര്‍ പറഞ്ഞിരുന്നു. എന്നാല്‍ കോവിഡ് മഹാമാരി മൂലം നടപടികള്‍ നീണ്ടുപോയി.
ഇക്കഴിഞ്ഞ വെള്ളിയാഴ്ച റിലീസ് ചെയ്ത ഒഎംജി 2 ആയിരുന്നു അക്ഷയുടെ ഏറ്റവും പുതിയ റിലീസ്. ബോക്സ് ഓഫീസില്‍ മികച്ച പ്രകടനമാണ് ചിത്രം കാഴ്ചവയ്‌ക്കുന്നത്. ഇതുകൂടാതെ, സൂരറൈ പോട്രുവിന്റെ ഇതുവരെ പേരിട്ടിട്ടില്ലാത്ത ഹിന്ദി റീമേക്കുമുണ്ട്.ചിത്രം സെപ്തംബര്‍ ഒന്നിന് തിയേറ്ററുകളില്‍ എത്തും. രാധികാ മദന്‍, പരേഷ് റാവല്‍ എന്നിവരും ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നു.
ടൈഗര്‍ ഷ്രോഫിനൊപ്പം ബഡേ മിയാന്‍ ഛോട്ടേ മിയാന്‍ എന്ന ആക്ഷന്‍ ത്രില്ലര്‍ ചിത്രത്തിലും അക്ഷയ് കുമാര്‍ അഭിനയിക്കും. ഈ ചിത്രം 2024 ലെ ഈദ് ദിനത്തില്‍ തിയേറ്ററുകളില്‍ എത്തും.
