പി.എന്‍.രാജേഷ്‌കുമാര്‍
അവളാദ്യമായാണ്
ആണുങ്ങളുടെ മുടിവെട്ടുകടയിലെത്തുന്നത്!
ആറാംക്ലാസ്സില്‍ പഠിക്കുന്ന
അനുജന്റെ മുടിമുറിക്കുന്നതവള്‍
കൗതുകത്തോടെ
നോക്കിയിരുന്നു!
വിരലുകളുടെ വേഗചലനം,
കത്രികയുടെ ദ്രുതതാളം,
പകുതി ബ്ലേഡു വച്ച കത്തികൊണ്ട്
കൃതാവിലും കഴുത്തിനുപിന്നിലുമുള്ള
മിനുക്കുപണികള്‍…
എല്ലാംകഴിഞ്ഞ്
സ്‌പോഞ്ചില്‍ പൗഡറിട്ട്
മുഖംതുടയ്‌ക്കല്‍!
അവള്‍ക്കാകെയൊരു പൂതി!
പെട്ടന്നവള്‍ തനിക്കു സ്‌കൂളില്‍നിന്നുകിട്ടിയ
ജന്‍ഡര്‍ ന്യൂട്രല്‍
യൂണിഫോമിനെപ്പറ്റിയോര്‍ത്തു
അനുജനിറങ്ങിയതേ
അവളാ കറങ്ങുന്ന കസേരയിലിരുന്നു.
അമ്പരന്ന് മുഖത്തേക്കുനോക്കിയ
മുടിവെട്ടുകാരന്റെ നേര്‍ക്ക്,
അനുജന്റെ തലയിലേക്ക് ചൂണ്ടി
അതുപോലെയെന്നാംഗ്യംകാട്ടി!
ആദ്യമൊന്നു പരുങ്ങിയെങ്കിലും
അവളെ വെള്ളപുതപ്പിച്ചിട്ട്
അയാളുടെ വിരലുകള്‍
അവളുടെയഴിച്ചിട്ട
നീണ്ടമുടിയിഴകളില്‍
ലിംഗതുല്യതയുടെ
പുതുചരിത്രമെഴുതി!
പിറ്റേന്ന് കാലത്ത്
മുന്നില്‍പ്പാഞ്ഞുപോയ
അനുജന്റെയൊപ്പമെത്താന്‍
പുത്തന്‍യൂണിഫോമിട്ട്
തലയുയര്‍ത്തിപ്പിടിച്ച്
അവള്‍ സ്‌കൂളിലേക്ക്
സൈക്കിളാഞ്ഞുചവിട്ടി!
വാലറ്റം:
എന്നും
കതിര്‍നുള്ളിചൂടാറുള്ള തുളസി,
തന്നെ ശ്രദ്ധിക്കാതെപോയ
അവളെ നോക്കി
തലകുമ്പിട്ടുനിന്നു!
ചുവന്ന പനിനീര്‍പ്പൂവുമായി
വരാന്തയിലെന്നും
കാത്തുനില്ക്കാറുള്ള
അടുത്തക്ലാസ്സിലെ രോഹിത്ത്
ഇനിയിന്നവളെ
തിരിച്ചറിയുമോ ആവോ?
