തിരുവനന്തപുരം: വീണ വിജയന്‍ മാത്രമല്ല, കോണ്‍ഗ്രസ് നേതാവ് രമേശ് ചെന്നിത്തലയും സിഎംആര്‍എല്‍ എം‍ഡി ശശിധരന്‍ കര്‍ത്തയില്‍ നിന്നും മാസപ്പടി വാങ്ങിയിരുന്നതായി വെളിപ്പെടുത്തല്‍. മാധ്യമങ്ങളില്‍ വാര്‍ത്തയായതോടെ രമേശ് ചെന്നിത്തല തന്നെയാണ് ഇക്കാര്യം സമ്മതിച്ചത്.
കോണ്‍ഗ്രസിന് വേണ്ടിയാണ് കെപിസിസി പ്രസിഡന്‍റ് എന്ന നിലയില്‍ പണം വാങ്ങിയതെന്നാണ് രമേശ് ചെന്നിത്തല പറയുന്നത്. പണം ലഭിച്ചതിന് പ്രത്യുപകാരമായി ശശിധരന്‍ കര്‍ത്തയ്‌ക്ക് ഒരു സഹായവും ചെയ്തിട്ടില്ലെന്നും എന്ത് ഉദ്ദേശ്യത്തോടെയാണ് അദ്ദേഹം സംഭാവന നല്‍കിയതെന്ന് അറിയില്ലെന്നും രമേശ് ചെന്നിത്തല പറഞ്ഞു.
വീണ വിജയന്‍ സിഎംആര്‍എല്ലില്‍ നിന്നും പണം വാങ്ങിയെന്ന വാര്‍ത്ത വന്നതോടെ പ്രതിപക്ഷം സര്‍ക്കാരിനെതിരെ ആഞ്ഞടിക്കാന്‍ ഒരുക്കം കൂട്ടുന്നതിനിടെയാണ് രമേശ് ചെന്നിത്തലയും ഉമ്മന്‍ചാണ്ടിയും എല്ലാം കമ്പനിയില്‍ നിന്നും മാസപ്പടിയായി ലക്ഷങ്ങള്‍ വാങ്ങിയിരുന്നതായി വെളിപ്പെടുന്നത്.
